Social Rehabilitation Board thutkhawm neih a ni

Social Rehabilitation Board chu nimin khan Social Welfare Minister Er. Lalrinawma hovin Aizawl-a SAD Conference Hall-ah an thukhawm.

Thutkhawm kaihruaitu Social Welfare Minister chuan an hmalakna a Member te inpekna chu chhuanawm a tih thu sawiin, an hmalakna chu kan ram leh khawtlang tan pawh thil tangkai tak a nih zel a beisei thu a sawi bawk. He thutkhawm ah hian Thingdawl-a Jordon Centre tih changtlun zel dan tur leh hmalak zel dan tur sawiho neiin Jordon Centre-ah hian mipa bik awmna tur khum 100 atanga 200 inkar siam belh turin ruahmanna siam a ni a, hemi rual hian helai hmuna awmte an Thlarau nun thlenga kaihruaitu tur an awm theih nana hmalak turin leh Jordan Centre atanga an chhuah hnuah pawh a anmahni puala eizawnna kawng zawh theih tura inzirtirna neih dan ruahmanna siam a ni a, chung atan chuan Skill training nasa taka kalpui tura ruahman niin heta tan hian After Care pawh tihchangtlun tura ruahmanna neih a ni bawk.

Thingdawl-a Jordon Centre hi Social Welfare Department leh sawrkar flagship SEDP nen tangkawpa enkawl niin tunah thawktu mi 40 vel awmin Superintendent-in a ho a, an enkawlna hnuaiah hian ruihhlo avang leh chhan dang avanga enkawl ngaite enkawl thin an ni a, he hmuna awm tur hian dilna siam thin niin a awm te hi a thlawn vek a enkawl thin a nih thu leh helai hmuna awm te hi an hriselna endik chungchangah NHM Kolasib-a thawktu ten uluk taka an kalpui thin thu tarlan a ni a, helai hmun hi Social Welfare Minister Er. Lalrinawma hian May 2, 2023 khan Social Rehabilitation Board members te leh thawktute nen an tlawh tawh bawk a ni.