Mizoram chhimlam-a Thlawhtheihna tumhmun siam tumin Aerial Survey neih a ni

Lunglei District chhunga Vuakmual chu Thlawhtheihna tumhmun siamna hmun tura thlan (identify) enfiahna ‘Aerial Survey’ chu nimin khan neih a ni.

Mizoram chhim lam tana Air connectivity tih hmasawnna tura hmalakna atana Helicopter-a Aerial Survey hi Kawmzawl Helipad, Lunglei atanga thlawk chhuakin Agriculture Minister C. Lalrinsanga, Rajya Sabha MP K. Vanlalvena, Lunglei HPC Vice Chairman Lawmawma Tochhawng leh I&PR Department, MJA Lunglei leh Political Party hruaitu an tel a. He Survey hi a tum khatna niin Technical Survey te pawh neih leh thuai tur a ni. he Survey-ah hian Vuakmual pan tur hian Lunglei atangin kawng siam ni dawn ta se, kawng engtianga sei (in kms) nge siam ngai ang tih te leh mimal in ram an la neih lohna (free land) a nih leh nih loh te pawh finfiah leh tur a ni a. Vuakmual pan tur hian Chhumkhum, Vanhne atanga De Lui kaltlangin Lunglei khawpui atangin lm 25-30 vel a thui tura chhut a ni a, Chhumkhum atang hian kawng hi la siam ngai a ni.

Sawrkar thuchhuah tarlan danin Mizoram Sawrkar ngenna avangin April ni 14, 2023 chawhnu dar 2:30-ah khan Civil Aviation Ministry-ah Rajiv Bansal IAS, Secretary, Civil Aviation leh Dr. Renu Sharma IAS, Chief Secretary, Mizoram te hovin Civil Aviation Ministry, Directorate General of Civil Aviation leh Pawan Hans hotulu te nen Mizoram sawrkar GAD Official te chuan thutkhawm neiin Mizoram chhim lama thlawhna tumhmun (Greenfield Airport) a rang thei ang bera siam ve a nih theihna tura hmalak dan tur te chipchiar takin an sawiho a. He meeting thutlukna chu, ‘Mizoram Sawrkarin a tul angin thlawhna tumhmun (Greenfield Airport) sak theihna hmun tur lo identify se la. He hmun identify a nih hnu hian Detailed Survey leh Detailed Project Report-te buatsaih ni se la,’ tih a ni.

Nimin-a Survey neih hi he thutkhawm thutlukna bawhzuina niin Survey-ah hian Vuakmual tlangdung hi Helicopter atanga a lan danin thlawhna tumhmun (Greenfield Airport) sak theihna tur a ni em tih te; a chhehvelah hian ram rem- Terminal Building, Fire Station, etc. sakna turte a awm em tih te; Vuakmual tlangdung chhehvela h hian thlawhtheihna tum tur/thlawk chhhuak tur tana hnawksak thei tur tlang sang hnaivaiah a awm em tih te enfiah a ni.

Vuakmual Airport siam tum hi Sawrkar Laipui Ministry of Civil Aviation hnuaia Regional Connectivity Scheme (RCS) – Ude Desh Ka Aam Nagrik (UDAN) 5.0 kaltlanga ruahman anih theihna turin Sawrkar Laipui-ah dilna thehluh tawh a ni.

Comments

Popular News (Last 30 Days)

LPG man bithliah thar