Serchhip-ah World Blood Donor Day hmangin Remna ni puala thisen pekna hawn a ni

Khawvel puma thisen petute puala ni bik, World Blood Donor Day chu nimin khan Serchhip-ah hman niin nikum chhunga thisen petu pawl hrang hrangte hnenah chawimawina hlan an ni a. Hemi rual hian kumin Remna ni puala a thlawna thisen pekna hun buatsaih chu hawn nghal niin tun thla ni 30 thlengin Remna ni pual hian thisen pek theih a ni ang.

Serchhip District Hospital Blood Bank leh Association for Voluntary Blood Donation (AVBD) Serchhip Branch te buatsaiha Serchhip CMO Conference Hall-a he hun hman hi Serchhip District Medical Superintendent Dr. ZD. Lalmuanawma chuan khuallian nia hmanpuiin World Blood Donor Day chu kumtin tlawmngaia thisen pe-a midang nunna hlu tak chhantute chawimawi let ve na hun atan hman thin anih thu a sawi a, he ni hi Thisen pek a pawimawh zia leh hlutzia tilangtu ni zel se a duh thu a sawi a, pawl hrang hrang te inpekna zarah leh AVBD leh Blood Bank a thawktute an thawhhona a that avangin damlo a mamawh apiangte hman turin thisen tlachham lovin kan awm thu sawiin, tlawmngai-a thisen pe duh pawh kan pung zel tih a sawi a, pawl hrang hrangte, AVBD leh Blood Bank a thawktute inpekna avangin mi tam tak nunna chhanhima a awm thu sawiin, Thisen pek chu a petu tan a hlauhawmloh thu leh hriselna lamah pawh a hlauhawm loh thu a sawi a, midangte tana thisen pe tura inzirtirna chu uar zawka neih zel a pawimawh thu a sawi bawk.


District Medical Superintendent chuan kumin Junne 30-a Remna Ni lo thleng tur chu urhsun taka hmang tura sawrkar in ruahmanna a siam thu leh chumi zingah chuan Remna Ni puala Thisen pek chu a tel thu a sawi a, Serchhip-ah pawh District Hospital Blood Bank leh AVBD te nen he hun hmang tura ruahmanna siam anih thu sawiin, Remna Ni puala thisen pekna buatsaih tur chu a hawng nghal a ni.

World Blood Donor Day leh Remna Ni puala thisen pek hawnna hun hi AVBD Serchhip Branch President Zonunsanga Kawlni chuan kaihruaiin Blood Bank Officer Dr. Lalnunhlima Khiangte chuan report a pe a, kum 2022 April thla atanga kumin March thla tawp thleng khan Serchhip Blood Bank chuan thisen Unit 963 dawngin heng zinga Unit 86 te chu mi tlawmngai ten Blood Bank-ah kala thisen a thlawna an pek a ni a, hemi hun chhung hian Blood Donation Camp tum 34 huaihawt niin heng Camp-ah hian thisen Unit 806 lak a ni a, a thlawna thisen an dawn zawng zawng hi Unit 892 niin hei hi thisen an dawn atanga chhutin za zela 92.62 a ni a, Replacement donation Unit 68 a awm bawk a ni.


Nimin-a he hun hmanna ah hian kum kalta a thisen petu pawl hrang hrang 31 te hnenah chawimawina thilpek hlan an ni a, chawimawina dawngtute hi Kohhran Thalai 18, Zirna In atanga thisen pe (NSS/NCC/DIET) 5, YMA Branch 5 leh pawl dang (NGO leh sawrkar Department) 3 niin tum 2 thisen pe pawl pathum an awm a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar