RD Minister in MzSRLM kaltlanga eizawnna nghet neih theih a ni chu lawmawm a tih thu a sawi

Rural Development Minister Lalruatkima chuan MzSRLM kaltlanga thingtlang lama harsa zawk ten eizawnna ngelnghet an nei thei chu lawmawm a tih thu a sawi.

Mizoram State Rural Livelihoods Mission (MzSRLM) hmalakna tur zirhona ‘Annual Action Plan Rollout Workshop’ kharna nimin-a Assembly Annexe Conference Hall-a neih a hmanpuina ah RD Minister Lalruatkima chuan he thu hi sawiin, Self Help Group (SHG) te hmasawnna sawrkarin a ngaih pawimawh thu leh MzSRLM leh Scheme dang- NREGS leh SPMRM te nen ‘convergence’ kalpui mek a nih thu a sawi a. Convergence kaltlang hian SHG, Village Organisation (VO) leh Cluster Level Federation (CLF) te tan hmasawnna ruhrel rotling engemawzat siam a nih tawh thu leh siam zel a nih tur thu a sawi bawk.

RD Minister chuan chuan National Rural Livelihood Mission (NRLM) hnuaia Scheme - Startup Village Entrepreneurship Programme (SVEP) leh Aajeevika Grameen Express Yojana (AGEY) kaltlanga chhungkaw tam takin hmasawnna leh eizawnna tha tak an hmu chu a lawmawm hle tih pawh sawiin, hei bakah hian Deen Dayal Upadhyaya Grameen Kaushalya Yojana (DDUGKY) hnuaia thingtlang thalaite thiamna tihpun a ni leh he Scheme kaltlanga eizawnna tha tak an nei chu lawmawm a tih thu a sawi a. SHG-te thil siam phochhuahna hun ‘SARAS Fair’ neih thin a nih thu pawh sawiin, Aizawl-ah SHG-te puala Wholesale/Retail Outlet neih tuma hmalak mek a nih thu a tarlang bawk a. SHG member-te thil siamchhuah chu zawrhchhuah tlak, quality tha leh midangte elphak a nih theih nan fuiha an mamawh ang thiamna pe zel turin a sawm a. MzSRLM hnuaia hlawhtlinna changte chu entawntlak a tih thu pawh sawiin, ‘Theihtawpa kawng zawn chuan theih loh a awm lo’ tih mi te hriattirtu an nih thu a sawi bawk.

MzSRLM Annual Action Plan Workshop hi Block leh District hrang hranga MzSRLM hnathawkte tan May 30 atang khan neih a ni a. Tun dinhmunah Mizoram State Rural Livelihood Mission hian Mizoram District 11 leh RD Block 28 ah hmalakna a kalpui mek a. Self Help Group 9124 din tawh niin member 75200 an awm mek a. Village Organisation (VO) 735 din tawh niin, Cluster Level Federation (CLF) 52 neih mek a ni bawk. SHG member ten sum an in puk chhawn tur Community Investment Fund (CIF) cheng nuai 15,541.09 chu VO/CLF ah pek tawh a ni a. Heng Community Funds an puk kual leh MzSRLM kaltlanga training hrang hrang an dawn te hmang hian thingtlanga mi harsa zawk ten eizawnna ngelnghet an neih phah mek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar