Raltlan te puih chhan Vote beisei vang a ni lo - MP (RS)

Mizoram Rajya Sabha MP K. Vanlalvena chuan MNF sawrkar in raltlan te a lo tanpui chhan chu Vote hmuh beisei vang a ni lo tih a sawi.

Rajya Sabha MP hian niminpiah khan Champhai District chhunga khaw thenkhat Vaphai, Farkawn leh Zawlsei te tlawhin Myanmar raltlante awmna leh an dinhmun te a en a, heng hmun a tlawhna ah hian Rajya Sabha MP chuan, “MNF sawrkar in raltlante a lo tanpui chhan chu vote hmuh belh beisei vang ni lovin kan unau ten tanpui an mamawh tih kan hmu a, kan tanpui mai zawk a ni,” a ti a. “Chu chu Mizo Kristian te nunphunga bet a ni,” tiinn khawtlang hruaitute leh NGO hruaitute bakah mipui ten raltlante hmangaih taka an lo tuamhlawm thin chu Pathian duhzawng a ni ngei ang tih a rin thu a sawi bawk.

Vaphai khawtlang in an khuaa High School leh Higher Scondary School atanga pawl 10 leh pawl 12 Exam ten an pass kim vek lawmna hun chu nimin khan Rajya Sabha MP hian hman-pui bawkin zirlaite chu hmalam huna hlawhtlinna nei turin mi awmthei fa nih leh mirethei fa nihin danglamna a nei lo tih a sawi a. Rilru mumal tak nei chunga tumruhna leh Pathian tihna nen chuan lehkha zirte hlawhtlinna tur hi tumahin an dal thei lo tih sawiin, zirlaite chu tumruhna nena lehkha zir turin a fuih a. Vaphai-a Myanmar raltlan zirlai awm mek ten Hnam lam an lo entir a ni.

Vangchhia khaw daia Kawtchhuah Ropui chu MP hian tlawh bawkin helai hmuna lungphun leh pipute sulhnu chi hrang hrangte chu kan pi pute sulhnu ngei a ni tih rinhlelh tur a awm lo tih a sawi a. Mi thenkhatin Hindu te sulhnu niawm taka an sawi thin chu thil hriatchian loh vang a nih a rinawm thu leh India ram hmun hrang hranga hmanlai Hindu te lungphun leh Vangchhia khaw dai-a lungphun te hian inlaichinna an neih a rinawm loh thu a sawi bawk.