CSS-a thawk ten June 15 thleng ngaihchan rel

All Mizoram CSS Employees Co-ordination Committee chuan sawrkar laka an thilphut chungchangah tun thla ni 15 thleng khian sawrkar ngaihchan an tum thu an sawi.

All Mizoram CSS Employees Co-ordination Committee hian nimin khan an hnuaia Department hrang hranga CSS Association Office Bearer te nen Joint Meeting neiin Sawrkarin CSS Employees te hamthatna tura ‘Study Group on CSS’ a din chungchang leh hemi thu kal zel an sawiho a. CSS Employee te hamthatna tura August 16, 2021-a Sawrkar in Study Group a din tawh leh Study Group in rawtna alo siam tawh chu tun thlenga a hlawhtlinna an la hmulo chu pawi an tih thu an sawi a, tun thla ni 15 ralhma ngeia Sawrkarin he rawtna hi a tihhlawhtlinsak loh chuan an kal zel dan tur All Mizoram CSS Employees Co-Ordination Committee chuan an ngaihtuah ang tih an sawi a ni. CSS Employee te hi Mizoram Sawrkar hnuaiah kum engemawzat chhung thawk tawh leh Mizoram hmun kilkhawr ber thleng a hmasawnna hna thawktu an ni tih pawh sawiin, tun dinhmunah member 12,000 vel an awm thu an sawi bawk.