Raltlan chungchang Union Home Secretary sawipui

Mizoram sawrkar aiawha Manipur raltlante chungchang Central sawrkar sawipui tura ruat Tourism Minister Robert Romawia Royte chuan nimin khan Union Home Secretary Ajay Kumar Bhalla chu a pisa-ah kawmin Manipur atanga Mizoram-a raltlante chungchang leh thu pawimawh dang a sawipui.

Tourism Minister hian May ni 3, 2023-a Manipura buaina a chhuah atanga tun thlenga Mizoram Sawrkar hmalak dan, Mizoram Chief Minister Zoramthanga'n Union Home Minister leh Manipur Chief Minister-te phone-a a biak nghal dante, Prime Minister leh Union Home Minister lehkha a thawn dante hrilhin, tun dinhmunah Mizoram-ah Manipur atanga raltlan mi 11,328 an awm mek thute leh heng raltlante hi naupang, hmeichhia leh pitar putar an nih tlangpui thu leh mipa thalaite chu an In leh lo veng tura Manipur ah an awm nia a hriat thute a hrilh a ni.

Robert Romawia Royte chuan Manipur tualchhung buaina in ziaawm lam a pan thei lo tih niminpiah mai-a thil thleng chuan a tichiang nia sawiin, Central sawrkar chu a tul anga a inrawlh zel a tul thu a sawi a. Mizoram sawrkar, NGO leh Kohhrante chuan Manipur buaina avanga raltlante chu theih ang angin an enkawl thu pawh sawiin, Central sawrkar puihna an mamawh hle tih a hrilh a. Mizoram sawrkarin raltlante enkawl nan Home Ministry-ah sum sanction rawtna a thlen te chu rang taka sanction turin Home Secretary hi a ngen a, sanction vat a nih loh chuan thil thalo zawk thleng thei a nih thute a hrilh bawk.

Union Home Secretary chuan Mizoram Chief Minister rawtna a lo hriat tawh thu sawiin, Manipur atanga an sahimna zawnga Mizorama raltlante tanpui nan Mizoram sawrkarah sum pek thuai a nih tur thu Tourism Minister hi a lo hrilh tih nimin-a sawrkar thuchhuah chuan a tarlang bawk a ni.