Kan rualpawl dan hi kan inenfiah a ngai; Hlawhtling turin daih rei leh peih rei a ngai - Health Minister

Health Minister Dr. R. Lalthangliana chuan, “Kan rualpawl dan hi kan inenfiah a ngai,” tiin hlawtling tur chuan daih rei leh peih rei a ngaih thu a sawi.

Nimin-a Samagra Shiksha Hnahthial District in Quality Education chungchang leh Zirlaite hmalam hun atana hriat tur tul pawimawh inzirtirna bakah HSLC leh HSSLC pass tharte lawmpuina hun Hnahthial Electric Veng Community Hall-a an buatsaih a hmanpuina ah Health Minister Dr. R. Lalthangliana chuan kum zabi 21-na hi Mizo thalaite tan chona-ah ngaih a tul thu a sawi a, “A pangngai, pass satliah tan hna hmuh a harin awmzia a awm lo, thiamna tak tak neih a ngai. Zirtirtute pawhin an zirlaite-ah chhawr tlak thiamna an pe thei tih an inhriat thar ka duhin chutiang tura an inbuatsaih pawh ka beisei a ni,” a ti a. Zoram Medical College-a Department hrang hranga hna an lak dawnin Mizo nula leh tlangval zinga qualify an vang thin hle tih pawh sawiin, hnamdang sawm a ngaih chang a awm thu a sawi a. Super Specialist Doctor pawh Mizo nula tlangval zingah kut zungtang thliah tham lek an awm thu leh Pilot pawh Mizo zingah 5 an awm tlin loh thu bakah All India Service lamah pawh sawi tur an van tak thu sawiin, “Kan rualpawl dan hi kan inenfiah a ngai a ni,” a ti a. Khawvel inher danglam chak takah Mizoram chhung chauh ngaihtuah lova dakchhuak zel turin Zirlaite chu fuihin, hlawtling tur chuan daih rei leh peih rei a ngaih thu a sawi bawk.

Hnahthial District Bawrhsap R. Lalremsanga pawhin tuna Hnahthial-a zirlaite chu Hnahthial hmalam hun an nih thu sawiin, Hnahthial chu District thar a nih angin District in a kentel hmasawnna tam tak kalpui a nih thu leh mipui ten a dawhthleng an dawh thiam a tul thu a sawi a. Kumin kumtawp lamah a vawi khat nan Hnahthial District chuan MLA inthlan a hmachhawn dawn thu leh chumi atan chuan inbuatsaihna pawh kalpui mek a nih thu a sawi bawk a. Hnahthial-a DEO leh Samagra-a DPC Micky R.Lalenkawla pawhin thu a sawi bawk a ni.

He hunah hian Hnahthial Centre atanga HSLC leh HSSLC pass tharte hnenah lawmpuina thuziak leh Dictionary hlan niin Govt. Hnahthial College hnenah tunhnaia Award an dawn lawmpuina thuziak hlan an ni bawk a. Zirlaite hmalam hun atana hriat tur tul inzirtirna hunah hian Lalhruaitluanga (ZoCareers) leh Helen Lalrinkimi (BHSS Serkawn) te chu Resource Person atan hman an ni bawk.