Governor leh MZU hotute Raj Bhavan-ah an inkawm

Mizoram University (MZU)-a Vice Chancellor Prof. Dibakar Chandra Deka leh Registrar Prof. Lalnundanga te chuan nimin khan Raj Bhavan-ah Governor Dr. Hari Babu Kambhampati an kawm.

He an inkawmna ah hian MZU hotute chuan tunhnaia MZU in NIRF Rankings thar berah University tha 500 chuang inel zingah nikum-a an dinhmun, 78-na atangin 76-na ah hma an sawn tih Governor chu hrilhin, MZU hnuaiah Medical College leh Law Faculty siam a theih dan kawng te leh rawtna lo awmsa thar thawh theih te ngun taka sawiho a ni a. Governor chuan MZU hotute rawtna te chu tha a tih thu sawiin, hemi chungchang hi Chief Minister sawipui se tha a tih thu leh Health Minister leh Law Minister te nen pawh inrawnna nei se tha a tih thu a sawi bawk.

Governor chuan Mizoram-ah mipuiin central Sawrkar hnuaia Scheme tha tak tak te leh Bank loan hman tangkai chungchangte kan la hrechiang lo chu a vei thu sawiin, Bank lam hotute chu vawi tam tak thutkhawm a neih pui tawh thu leh Bank lam chuan tanpui tlak, tanpui mamawh leh loan rul thei tur chu puih an inhuam tih a sawi a. Central Welfare Scheme hrang hrang te, Life Insurance Scheme hrang hrang te kan hre tawk lo leh a hlawkna kan tel thin lo chu pawi a tih thu a sawi a. Hemi kawngah hian mipui zirtirna chungchangah emaw, Bank ho in statistics an mamawh atana Market Survey chungchangah te MZU zirlai leh Research Scholar te hman tangkai a rawt bawk a ni.