MZP Hqrs. Serchhip ten kumin a HSLC leh HSSLC Exam-a tithate chawimawina hun an hmang

Mizo Zirlai Pawl (MZP) Hqrs. Serchhip chuan kumin-a pawl 10 zirlai HSLC Exam-a Distinction-a pass leh pawl 12 zirlai HSSLC Exam-a Distinction-a pass chin te chawimawina hun nimin khan Serchhip Auditorium-ah buatsaihin bialtu Serchhip bialtu MLA Lalduhoma chuan khuallian niin a hmanpui.
Nimin-a zirlai tithate chawimawina hunah hian bialtu MLA Lalduhoma chuan HSLC leh HSSLC Exam-a zirlai hlawhtlinna chang te chu a lawmpui thu sawiin, khawvel sawrkar changkangte chuan Hriselna leh Zirna an ngai pawmawh ber thin thu a sawi a. Mizote chu rilru chak tak leh lehkha pawh thiam thei tak kan nih thu sawiin, tunlai thangthar a zirlaite chuan kawng hrang hranga an vanneih tawh zia an hriat a pawimawh thu a sawi a. Zirna kalphung tih danglam chhoh zelah tuna kan hman mek National Education Policy (NEP) 2020 hrulah hian kan ram, kan hnam zia leh kan Sakhaw milin zirna hi kan lo siksawi ve a thiang tih sawiin, NEP 2020 hnuaiah hian By-heart system tihbo anih tawh thu pawh a sawi bawk.

Serchhip bialtu MLA chuan kan rama zirna a tlakchhiat chhan pakhat chu zirtirtu lak uluk tawk loh vang leh fuh tawk loh vang a nih thu sawiin, Ruling Party mi leh sa an nih avanga qualified lem lo lak an ni thin chu pawi a tih thu a sawi a. Kan ramah Kohhran leh Private School ten an tih that zawk thin avangin an School Managing Board kalphung anga Sawrkar School te Public Private Partnership (PPP)-a kalpui thiam ve mai tha a a hriat thu leh Education Department chu mithiam ngeiin enkawl se a duh thu a sawi bawk.

MZP Hqrs. Serchhip ten HSLC leh HSSLC Exam-a zirlai tithate chawimawina hun nimin a an hman hi an Vice President K. Lalmalsawma chuan kaihruaiin Uaptu ni-a he hun rawn hmanpuitu MZP General Hqrs. President Lalnunmawia Pautu chuan MZP Hqrs. Serchhip ten zirlai tithate chawimawina hun an buatsaih chu lawmawm a tih thu leh zirlai tithate chu he huna an mi pawimawh ber te an nih thu a sawi a. An kal zelna turah duhsakna hlanin chawmawi tlak ni tura zir chhunzawm zel turin a chah a, chawimawi tur zirlai petu Zirtirtute leh zirlai nu leh pa te chungah lawmthu sawiin, zirlaite tan MZP chu an din reng dawn thu a sawi bawk.

Nimin-a zirlai tithate chawimawina hunah hian Serchhip-a High School leh Higher Secondary School-a HSLC leh HSSLC Exam-a Distinction-a pass mi 30 te hnenah chawimawina hlan an ni a, hei bakah hian HSLC Exam-a zirlai za-a za pass Goodwill English School Serchhip hnenah chawimawina an hlan bawk a ni.