Mizoram-a Zirlaibu la sem loh sem zawh tep a ni

School Education Department hotute chuan kum dang aiin Zirlaibu an sem muang tih sawiin, la sem kim lohte erawh an sem zo tep tawh tih an sawi.

Zawhna chhangin School Education Department hotute chuan kumin-a Academic Session thara zirlaibu semchhuah a muan chhan chu zirlaibu chhu tura an tihfel hmasak zawkte an inhnuhdawh leh tak vang a nih thu an sawi a. Education Department hotute sawi danin zirlaibu chhu tur hian Dehradun-a Printing Press pakhat chu nikum September thla khan an be fel a, an duh dan anga sawrkarin a leisak theih loh avangin December thla ah an inhnukdawk leh a, chumi hnu kumin kumtir lamah Aizawl-a Printing Press pakhat chu chhuttir a ni leh ta a ni.

Aizawl-a Printing Press pakhat chuan kumin kumtir ah zirlaibu an chhu tan a, kum danga an chhut tan thin aiin an tlai bakah Printing Press hian lehkha phek lei kawngah harsatna an tawk leh ta bawk nen zirlaibu chhut hi a chak thei ta lova. Chuti chung chuan chhut zawh apiang chu District hrang hrangah thawnchhuah nghal zel a ni a, hun reilote ah lehkhabu hi an sem zawh theih mai an beisei a ni.

Chhhinchhiahna atanga a lan danin May 22, 2023 thleng khan Mizoram pumah zirlaibu a thlawna sem tur za zela 79.75 sem a ni tawh a, Aizawl District-ah 81.56%; Hnahthial District-ah 88.36%; Champhai District-ah 76.25%; Khawzawl District-ah 96.61%; Kolasib District-ah 80.90%; Lawngtlai District-ah 79.50%; Lunglei District-ah 81.13%; Mamit District-ah 76.92%; Saitual District-ah 77.33%; Siaha District-ah 93.81% leh Serchhip District-ah 93.35% sem a ni tawh a ni.