Mizoram CEO in Assembly inthlanpui neih tur atana Kolasib District inbuatsaihna kal mek a enfiah

Mizoram Chief Electoral Officer (CEO) Madhup Vyas IAS chuan nimin khan Kolasib District tlawhin kumin a Mizoram in MLA inthlanpui neih tur atana inbuatsaihna hrang hrang kalpui dan a enfiah a. Ramri-ah te ralmuanna leh boruak tha a awm zel theih nan District thenawm a thuneitute nen thawhhona tha nei zel turin a chah bawk.

Kolasib District tlawhtu Chief Electoral Officer Madhup Vyas hian Kolasib DRDO Conference Hall-ah District chhung Assembly bial pathum- Tuirial, Kolasib leh Serlui bial-a Electoral Registration Officer (ERO), Assistant Electoral Registration Officer (AERO) leh Booth Level Officer (BLO) thenkhatte kawmin Mizoram-ah inthlanna langtlang leh felfai a awm theih nan inthlan buaipui tura mawhphurhna nei zawng zawngte chu Election Commission of India-in inkaihhruaina a duan hrang hrangte chhiar tam turin a chah a. Kolasib District-a thuneituten Electoral Roll ennawnna an kalpui dan leh Electoral Roll rintlak siamna kawnga an hmalakna chu lawmawm a tih thu sawiin, inthlang tura inbuatsaihna hmasa atan June ni 13 atang khian First Level Checking (FLC) of EVM kalpui tan a nih tur thu a sawi a, hna tha taka kalpui a nih theih nan fimkhur taka endik hna thawk turin a chah a. Kolasib District chhung ramri-ah te ralmuanna leh boruak tha a awm zel theih nan District thenawm a thuneitute nen thawhhona tha nei zel turin a chah bawk a ni.

Mizoram CEO Madhap Vyas chuan Kolasib District chhunga Polling Station tinah hnathawh theih tur a mamawh hrang hrang, Assured Minimum Facilities awm vek tur a nih thu pawh he hunah hian sawiin, Hmeichhia vote thlakna tur bik ‘Pink Polling Station’ leh Polling Station tha tak a thuam, Model Polling Station siam tur a nih thu a sawi a. Voter zaa 85 talin vote an thlak theih nan tan la turin leh inthlan hnuhnung ber a vote tlak tlemna Polling Station-te zirchiang turin kalkhawm te a chah bawk a ni.

He thutkhawm ah hian ERO, AERO leh BLO-te inbuatsaihna kalpui dan sawiho niin First Level Checking (FLC) of EVM kalpuina tur hmun te, EVM dahthatna hmun Strong Room te, Vote chhiarna hmun (Counting Hall) tura ruahman leh Kolasib khaw chhunga Polling Station thenkhat pawh a hmunah a endik a. Bru Voter Electoral Roll atanga hming paih hna kalpui dan te sawiho a ni bawk.

Electoral Roll thar ber atanga a lan danin Assembly Constituency pathum (3) awmin District pumah Voter 63,356 a awm a, Polling Station 89 a awm bawk a ni.