Governor in PUC hlawhtlinna a lawmpui thu a sawi

Sawrkar laipui-a Ministry of Education in National Institutional Ranking Framework (NIRF) India Ranking 2023 a tihchhuah ah Pachhunga University College (PUC) in 34-na dinhmun a luah chu Mizoram tana inchhuanna tham a nih thu Governor Dr. Hari Babu Kambhampati chuan a sawi.

PUC (constituent College of Mizoram University) in NIRF Ranking a India ram pum-a College tha 34-na nihna a hauh avanga lawmna hun leh hemi puala ni 2 awh tur International Symposium nimin-a an buatsaih a hmanpuina ah Governor, MZU-a Chief Rector ni bawk Dr. Hari Babu Kambhampati chuan PUC hlawhtlinna chu Mizoram tana inchhuanna tham a ni tih sawiin, an hlawhtlinna ah thinlung takin a lawmpui thu a sawi a. He dinhmun thleng tura theihtawp chhuahtu zawng zawngte hnenah lawmpuina a hlan nghal a. PUC in he hlawhtlinna lawmna atan International Seminar an huaihawt chu thil remchang tak a nih thu a sawi bawk.

Pachhunga University College chuan hlawhtlinna lian tham thawk chhuak turin theihtawp a chhuah bakah a thawktu – Zirtirtu leh Office hnathawk te bakah Zirlai ten an theihna sang ber a hlan thin nia a lo hriat thu Governor chuan sawiin, hetianga awmze nei, thil tum chiang taka nei chunga hmalam an pan theih zel phawt chuan hun reilote ah PUC chu India rama College tha filawr a la nih theih a rin thu leh nakin lawkah Deemed University dinhmun pawh an la hlawhchhuah a beiseiawm hle niin a sawi a. National Education Policy 2020 hmathlir anga PUC hi a kal zel a nih chuan Teaching intensive and Research intensive University a la nih thuai a rin thu a sawi bawk.

Tunhnai khan ‘India Ranking 2023’ chu National Institutional Ranking Framework (NIRF), Ministry of Education, Govt. of India chuan a tichhuak a. NIRF Ranking thar berin a tarlan dan chuan tehfung hrang hrang hmanga teh a nih hnuah Pachhunga University College (PUC) hi India rama College tha bik 100 a thlanchhuah zingah 34-na ah a dah a. Hei hi nikum lama NIRF Ranking-a PUC rank 45-na atanga teh chuan hmasawnna lian tak niin India Hmarchhak huamchhunga College dang te zingah NIRF Top 100-a lang an la awm lo a ni.

PUC hi Mizoram-a College kan neih zinga upa ber leh hmun nei tha ber a ngaih a ni a. PUC ram hi Acre 122 laia zau niin Arts, Science, Commerce leh Management Streams-ah te zirna kalpui mek a ni a, Department 23 awmin zirlai 3000 chuang an nei mek a. NAAC in CGPA of 3.47 out of 4 Rating peiin A+ Grade College a ni mek a. Nimin-a he hun hmanna ah hian PUC Principal Prof H. Lalthanzara chuan inlawmna thu sawiin, Dr. Lalhriatzuala, Head, Dept. of Physics chuan NIRF ranking chungchangah leh hemi atana an hmalakna te a tarlang bawk a ni.