MAMCO sum tihchingpen thu ah thiamloh chantir ve leh

MAMCO sum cheng nuai 268 tihchingpen a puh vanga ACB in thubuai an siamsak Musta Gur Rahman s/o Adbur Rahman, Gauhati chu Special Judge (PC Act) Court in thiamloh chantirin June 5, 2023-ah hremna a puang ang.

MAMCO sum cheng nuai 268 tihchingpenna ah hian ACB chuan December 3, 2015 khan thubuai an ziaklut a, he thubuai an chhuinaah khatih laia MAMCO Deputy Manager Lalremthanga leh a Consultant Musta Gur Rahman chu inhnamhnawihah puh an ni a. ACB chuan Lalremthanga leh Musta Gur Rahman te hi manin Interim Bail hmangin Court-in a chhuah a. A hnuah Guwahati High Court, Aizawl Bench chuan Musta Gur Rahman bail dilna hnawlin Court hniam zawka kal turin Order a siam a. Musta Gur Rahman hi Court hniam zawkah inlan loin a tlanbo zui a ni.

Lalremthanga chu Special Judge (Prevention of Corruption Act) chuan November 22, 2022 khan thiamloh chantirin, kum 5 chhung tang tur leh Rs. 5,00,000 chawi turin a hrem a. Musta Gur Rahman man phalna (warrant of arrest) pawh Court chuan a tichhuak nghal bawk a. ACB chuan warrant of arrest bawhzuiin Musta Gur Rahman chu an zawng reng a, Mizoram a IPS Officer lo thawkte puihna in February 24, 2023 New Delhi-ah manin Mizoram-ah lak a ni a. A thubuai ah hian Dr. HTC. Lalrinchhana, Special Judge (PC Act) Court chuan nimin khan thiamloh a chantir ve leh ta a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar