Kumin-a HSLC leh HSSLC-a Topper te hnenah Chief Minister's Award hlan an ni

Mizoram sawrkar School Education Department buatsaihin kumin (2023)-a HSLC (High School Leaving Certificate) leh HSSLC (Higher Secondary School Leaving Certificate) exam a Topper te hnenah nimin khan ‘Chief Minister's Award’ hlan an ni.

Aizawl Chanmari YMA Hall-a Award hlanna hun hi Chief Minister Zoramthanga chuan khuallian nia hmanpuiin HSLC leh HSSLC tithate hnena CM Award sem chu kumtin zirlai lehkhathiam tak tak ten an dawn thin avangin a hlutna a kiam ngai lova, pek an nihna chhan hi a ropui em avangin kan ngaihlu telh telh a ni, a ti a. Zirthiamna kungpui-ah hian finna, ropuina, remhriatna, taimakna, tumruhna leh hlawhtlinna a inzemnghet em em tih sawiin, “Zirthiamna hian kan suangtuah phak loh thleng hian kawng min lo hawn sak thin a, midangte tana malsawmna nihna kawng pawh a hawng zau bik thin a ni,” a ti a. Pathian in mihring te a siam hian chhia leh tha hriatna min pek tel thu sawiin, chumi hmang chuan duhthlan theihna min ruahman sak bawk a, he kan duhthlan theihna hi kan hman thiam a pawimawh em em a, zirlaite pawhin hei hi fing taka kan hman theihnan rilru fim kan put a pawimawh em em a, kan damchhung nun a hril dawn a ni, a ti bawk.

He hunah hian Khual zahawm School Education Minister Lalchhandama Ralte pawhin zirlai hlawhtlinna changte leh an nu leh pa te lawmpuina a hlan a. Mizoram sawrkarin hun harsa leh khirh tak kum 2 chhung hmachhawn chunga zirna tihhmasawnna tura kawng hrang hranga a theih ang anga hma a lakna te pawhin rah tha a chhuah mek tih sawiin, “Sawrkar School-ah pawh zirlai naupang an pung sawt hle a, tunhma a sawrkar School-ah chuan zirlai leh zirtirtu an inzat an tih thin kha tunah chuan a ni ta lo, Zirtirtuten theihtawp chhuaha zirlaite hmakhua thlir chunga tan an lakna avangin hmuh theihin hma kan sawn a ni,” a ti bawk.

Chief Minister hian HSLC Topper Cynthia Lalhlupuii Shangpliang d/o Kyrshanbor Shangpliang, Falkland Veng (Aizawl, St. Paul's HSS) bakah HSSLC-a Topper pathum- Arts-ah Rodinpuia Ralte s/o Lalremruata, Hlimen (Home Missions School); Commerce-ah Jonathan Lalhruaitluanga s/o C. Lalduhawma, Hnahthial Chanmari (St. Joseph's HSS) leh Science-ah Vanlaldika s/o Lalfakawma Hauhnar, Tlangnuam West, Aizawl (St. Paul's HSS) te hnenah lawmpuina thuziak (citation) leh tangkafai Rs. 50,000/- theuh a hlan a ni. Chief Minister's Award hi kum 2013 atang khan bultanin kumin hi tum 11 semna a ni.