Sangha thleng leh tan dawn

Tunhnaia Phai Sangha lakluh zingah Khawnvartui rim nam a awm nia sawi a nih avangin Sangha lakluh a khaihlak hnuah Serchhip-ah chuan Vawiin hian Phai Sangha hi a rawn thlen tan leh theih beisei a ni.
Tarlan tawh angin May 26 khan Health Department hnuaia Food & Drugs Administration chuan Phai atanga Sangha (Rohu) lakluhah khawnvartui rim nam a awm thu hmun hrang hrang atanga an dawn thu leh hei hi bawhzui nghal niin Sample engemaw zat chu Central Food Laboratory, Kolkata-ah thawn a nih thu thuchhuah siamin an tarlang a, mipuite pawh hetiang Sangha lei leh ei lo insum a him ber tih an chah bawk a ni.

Hetianga sawrkar in hma a lak hnu hian Serchhip-a Phai Sangha zuartute chuan May 26 (Zirtawpni kalta) hnu lamah Phai Sangha hi an chah thleng tawh lo tih an sawi a, amaherawh chu Sangha Sample te hi enfiah a nih hnuah Vawiin hian Sangha te hi an chah thleng leh tan tawh dawn tih sawiin, heng Sangha rawn thawntute chuan Sangha Sample enfiah ah engmah hlauhawm a awm lo tih an rawn hrilh tih an sawi a ni. Thudawnna pakhat chuan Khawnvartui rim nam awm avang hian Formalin leh a kaihhnawih a awm thei em tih enfiah a nih thu pawh tarlangin, Sangha an test ah hian Formalin hi hmuh a awm lo niin a tarlang bawk a ni.