Tlabung-ah RD Block thar RD Minister in a hawng

Mizoram-a RD Block 28-na atan Tlabung RD Block thar chu nimin khan Rural Development Minister Lalruatkima chuan a hawng a, Tlabung RD Block Office hawng nghalin Tlabung RD Block Office New building sakna tur lungphum a phum nghal bawk.

Tlabung Rural Development Block Office Complex-a RD Block thar lawmna inkhawm neih ah RD Minister Lalruatkima chuan Mizoram history-a hmun pawimawh tak luahtu, Mizoram kawtchhuah hmasa Tlabung in RD Block an nei ta chu a lawmpui thu sawiin, kum 30 chuang zet hnuah Mizoram in RD Block thar pahnih - Kawrtethawveng leh Tlabung RD Block-te kan nei leh thei chu thil chhinchhiah tlak leh hmasawnna ropui tak a ni, a ti a. RD Block thar neih chu thil awl ai lo tak leh harsa taka sual chhuah anih thu sawiin Minister chuan, Mizoram-ah hmasawnna rualkhai a awm theihnan Sawrkar chuan thuneihna semzai leh kan banphak a Sawrkar chhawpchhuah zel a tum a ni, a ti.

Tlabung RD Block chuan Department hrang hrang hmalakna te a keng tel dawn tih Minister chuan sawiin, heng hmalakna te ti hlawhtling tur hian Block mipuiten anlo thawhpui thiam a tul dawn thu leh mipuite chu tha taka sawrkar thawhpuia lo finchhuah thin turin a chah a. Mizoram RD Department chu ram pum huap pawha hna thawk tha an nih thu sawiin, Department thawktu zawng zawngte thahnemngaihna leh inpekna avangin an chungah lawmthu a sawi bawk.

He hunah hian khualzahawm Lunglei HPC Vice Chairman Lawmawma Tochhawng MLA bakah West Tuipui bialtu MLA Nihar Kanti Chakma te pawhin thu an sawi a ni. March ni 25, 2022-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut chu a pawm a. Tlabung RD Block thar hi May ni 20, 2022 khan Lungsen RD Block leh Bunghmun RD Block atanga then hran niin Tlabung RD Block chhungah hian Authorised Village 17 leh Authorised Sub-Vllage 10 a awm a ni.

RD Block Office bul tana BDO hmasa ber ni turin Mizoram sawrkar chuan H. Zonunmawia, SDO(C) Tlabung a ruat a, MGNREGA atangin Staff 16 an awm tawh a. Tlabung RD Block thar vil tur hian BDO 1, Assistant 1, Inspector of Statistics 1, UDC 1, LDC 1 leh IV Grade 2 te chu nikum October 7 khan Sawrkarin a siam thar a, Block thar pahnih - Kawrtethawveng leh Tlabung RD Block te enkawl zuina turin cheng nuai 66.42 chu Finance Department in nikum Nov. 1 khan a allocate tawh bawk a ni. Tlabung BDO Office, Officer quarter leh Staff quarter turte hi sak tan thuai tura ruahman a ni bawk.