Mizoram PWD hotuten an kawng enkawl dinhmun Governor an hrilhfiah

Mizoram PWD hotute chuan nimin khan Governor Dr. Hari Babu Kambhampati hmuin an Department hnathawh leh hmalakna thenkhat, National Highway leh Pradhan Mantri Gram Sadak Yojana (PMGSY) chungchang te an hrilhfiah a. Harsatna awm te sawrkar laipui-ah thlen pui a duh thu Governor chuan a sawi a ni.

Raj Bhawan Conference Room-a an hmalakna an sawifiahna hunah hian Larsap chuan PWD in hna hrang hrang an kalpui mek dinhmun te, hna a hun taka zawhloh a nih chhan te leh hemi kawnga harsatna an nei te hriat a duh avanga PWD hotute chu ko a nih thu sawiin, heng te hi Ministry lamah amah pawhin sawipui leh thlen a duh thu a sawi bawk a ni.

PWD hotute tarlan danin PWD hian National Highway leh a kaihhnawih hna 5, cheng vbc. 2554.98 hu an thawk mek a; heng zinga NH-108 (Sairang – New Eden, Tripura) chu za zelah 94 zawh a ni tawh a; NH-501A (Lawngtlai – Zochachhuah, KMTTP) chu za zelah 98.01 zawh tawh niin NH-2 (Seiling-Tuivai) in a huam chhunga km 17.5 a thui chu tunhnai khan zawhfel a ni a; hna dang 2 te chu thawh mek a ni bawk. Heng bakah hian National Highway hna thar 3 tan tur an nei a, hna dang 6 pawh Ministry of Road Transport and Highways-ah proposal an thehlut mek a ni. Heng zinga Tuivai lui chunga leidawh tur chu a pawimawh em avangin hemi chungchang hi a hranpa in Larsap in Ministry lam a sawipui tur thu PWD hotute a hrilh a ni.

Mizoram chhunga National Highway sial tawh leh sial mek zawng zawng thui zawng chu km 1509 a ni a, heng zinga km 650 chu PWD in a sial tawh leh hma an lak mek te a ni a; a bak chu NHIDCL chan niin heng zinga thui ber chu tuna NH-2 tia vuah tak, Seling – Tuipang (NH-54) leh Seling – Tuivai (NH-150) suihfin, km 481 a thui hi a ni.

Pradhan Mantri Gram Sadak Yojana (PMGSY) hnuai hmalakna an tarlan ah PMGSY hi kum 2000 atanga thawh tan niin Phase 12 hnuaiah Mizoram pumah project 351, kawng KM 4482.732 a thui cheng vbc. 2840.08 man sanctioned a ni a. Heng zinga project 300 chu thawh zawh tawh niin Project 51 thawh mek a ni a, sanctioned KM 4482.732 atangin km 4247.534 a thui chu zawh tawh niin km 277.735 hi an la thawk mek a. Heng project kaltlang hian khua 232 zinga 216 in PMGSY kawng a nei tawh a ni. Larsap chuan Bairabi leh Sairang Rel kawng inkara Railway Station 4 awm te chu a bulhnaia khua awmte nen inkawlpawhna sial a pawimawh thu sawiin, hemi chungchanga hmalak pawimawh a tih thu a sawi bawk.