Gauhati High Court kum 75-na lawmna neih a ni

Nimin April 5, 2023 kha Gauhati High Court kum 75-na champha niin Gauhati High Court Aizawl Bench chuan he ni lawmna atan hian ‘Challenges and the way forward for the judiciary in Mizoram’ tih thupui hmanga Seminar buatsaihin Governor Dr. Hari Babu Kambhampati chuan khuallian niin a hmanpui a ni.

District Court Building Conference Hall, Aizawl a he hun hmanna ah hian Governor chuan Sovenir Ceramic Plate tlangzarhin Gauhati High Court Platinum Jubilee lawmna hunah a tel thei chu lawmawm a tih thu a sawi a. India ramah Judiciary pawimawhna, Danpui humhalhtu a nihna te, Democracy lungthu dang pahnih Executive leh Legislature te khalh ngiltu a nihna te a sawi bawk. Governor chuan kan ram-a Court thutlukna leh Judiciary-ah te rinna kan nghat tih sawiin, rorelna dik chang turin beiseina eng kan nei chu kan vanneihna a ni tih a sawi a. Hetih rual hian India ram Judicial system a thil siamthat ngai chu kan beisei aiin Court thutlukna siam chhuah a muang thin chu a nih thu a sawi bawk.

Tuna Gauhati High Court ni ta hi High Court of Assam tiin April 5, 1948 khan din a ni a, Sitting hmasa lam Shillong-ah neih thin a nih hnuiin August 14, 1948 khan Gauhati-ah sawn a ni. Kum 1963 a Nagaland State a lo pian khan High Court of Assam & Nagaland tih a ni leh a. A hnu deuhah North Eastern Area (Reorganization), Act 1971 hnuaiah State 5 -Assam, Nagaland, Manipur, Meghalaya leh Tripura bakah UT 2 - Arunachal Pradesh leh Mizoram intawm turin Gauhati High Court tih a ni leh a. February 20, 1987 atangin State 7 - Assam, Nagaland, Manipur, Meghalaya, Tripura, Arunachal Pradesh leh Mizoram ten an intawm ta a ni.

NE State dang ten anmahni puala High Court an neih deuh vek tak hnuah tunah hian Gauhati High Court hi Assam, Mizoram leh Arunachal Pradesh ten an intawm mek a. Principal Seats Guwahati-ah awmin Aizawl leh Itanagar-ah te Bench a awm mek a. Aizawl Bench, Gauhati High Court hi July 5, 1990 khan din niin kum 2008 a Judiciary an indan atang khan Aizawl Bench, Gauhati High Court chuan Mizoram-a Court zawng zawng leh Tribunal kaihruai hna a thawk tan a. Tunah hian Mizoram-ah Judicial District 3 – Aizawl District (Aizawl, Kolasib, Mamit leh Saitual), Lunglei District ( Lunglei, Lawngtlai, Siaha leh Hnahthial) leh Champhai District (Champhai leh Khawzawl) a awm mek a ni.

He hunah hian Justice Marli Vankung, Judge, Gauhati High Court chuan inlawmna thu sawiin Gauhati High Court Justice Nelson Sailo bakah Mizoram Bar Association aiawhin C. Lalramzauva, Senior Advocate, Adviser to Chief Minister te pawhin thu an sawi bawk.