Pawisa a in lei tlin ngawt theih loh tilangtu ah ngai

ZPM Leader Lalduhoma chuan Serchhip leh Lunglei Municipal Council inthlana ZPM candidate thlantlin an ni chuan pawisa hmanga inleitlin ngawt a theih tawh loh a ni tih chiang takin a tilang niin a sawi.

ZPM Tuivawl Block Conference Vawi 7-na nimin-a Sakawrdai-a neih a hmanpuina ah ZPM Leader Lalduhoma chuan nawmsak hmasak a, reilote chhunga hausak thur thur tuma politics kan khelh chhung chuan kan ram hi a chhe zel dawn tih sawiin, “Sawrkar Official leh mipui mimir pawh rinawm hlei thei lovin min siam ta mek a ni. Thlarau thianghlim tel ve theih lohna in chhungkaw tam takin ei kan zawng mek a, Pathian malsawmna kan dawng thei lo a ni. Dik lohna hi ngaiah kan neih ta mek a, dik lo zawk awtin leh itin kan nun kan hmang mek a ni,” tiin “A langin sum leh pai hmangin vote kan zawng a, chuti chung chuan neih engmah nei lo ZPM Candidate te Serchhip leh Lunglei a LMC thlanna neihah thlantlin kan ni. Hei hian pawisa hmanga inleitlin ngawt a theih tawh loh a ni tih chiang takin a tilang a, a lawmawm takzet a ni,” a ti bawk.

ZPM Leader chuan Pathian leh mipui zara sawrkarna an chan chuan Sakawrdai hmun kawtchhuah pawimawh tak chu an ngai pawimawh hle dawn tih pawh sawiin, kawng leh lui te chu a theih anga thaa cheibawl an tum dawn tih a sawi a. Sinlung Hills Development Council in dan mumal tak a neih theihna turin hun rei tak atang tawh khan Assembly House-ah pawh an lo au ve tawh nia sawiin, “ZPM a sawrkar hunah chuan sawrkarna chelhtu leh Hmar mipuite hi pumkhatin kan awm ang a, pawl pawl awma kan kal reng hi tihtawp a ni anga, Aizawl-a Council Office awm pawh hi helai hmunah ngei hian sawn a ni ang,” a ti bawk.