Ngopa khua in khawpui fai ber lawmna an nei

Saitual District-a Ngopa khua chuan kum 2022-a ‘Mizoram khawpui fai ber inelna’ a lawmman pakhatna an lak lawmna nimin khan neiin Health Minister Dr. R. Lalthangliana chuan khuallian niin a hmanpui.

Ngopa Jubilee Hall-a khawpui fai lawmman pakhatna lawmna hunah hian Health Minister chuan Mizoram-a khawpui fai ber nih chu thil harsa tak a nih thu sawiin, Ngopa khua chu chhuanawm a tih thu leh an thawhrimna fakawm a tih thu a sawi a. Lang thei lo faina chu rilru hrisel a nih thu sawiin, rilru hrisel leh thianghlim chu chung lam lawm zawng a ni tih a sawi a. Ngopa pawh an khua a fai mai bakah, rilru fai leh thianghlim lo pu zel tura chahin, “Midang tana hnawk sak lo, midang tana malsawmna ken tlat hi faina hian a kengtel nghal a ni. Midangte tan luang chhuak nun neih hi Pathian in nung tura min duh dan chu a ni,” a ti bawk.

Health Minister chuan Covid chuan Vawiin thlengin sawrkar hna lak ah nghawng ala neih thu sawiin, amaherawh chu tan an la zel dawn tih a sawi a, Ngopa CHC building sak thar hna pawh an hna hmasa tur a ni ang tih a sawi bawk.

He hunah hian khual zahawm bialtu MLA Dr. L. Thangmawia chuan he hun an hman theihna tura thahnem ngai taka buaipuitu Ngopa Welfare Committee chungah lawmthu sawiin, Ngopa mipui thawhrimna kuhmum-ah bialtu MLA chu a par ve chauh thu te, Ngopa khua hi Town a nih theihna tura hma an lak dan te, cheng nuai 3000 senga Saitual to Saichal road tuna an blacktop pawh MLA a nih tirh atanga a vei thu leh an hmalakna chu Pathian in mal a sawmna ah lawmthu a sawi a. Kum hnih chhunga khawfai pahnihna atanga pakhatna ah an inhlang kai thei chu lawmawm a tih thu a sawi bawk.

Ngopa khua in khawpui fai lawmman an lak lawmna hun hi Ngopa Town Sanitation & Cleanliness Committee Chairman V. Lalengkima chuan kaihruaiin Nodal Officer leh SDO (Civil) Vanlaltanpuia; UD&PA Director H. Lianzela; PHE Department-a PMU Director Er. H. Lalduhkima leh Ngopa Welfare aiawhte pawhin thu an sawi a ni.

Health Minister hian Saichal, Hliappui leh Pawlrang-a Sub-Centre, tunhnaia Health & Wellness Centre-a an hlankai takte pawh tlawh nghalin Health & Wellness Centre angin hna an thawk em tih te a enfiah a, harsatna hrang hrang leh mamawh an neihte zawtin theihtawpa hma an lak zel tur thu a sawi bawk. Hei bakah hian Ngopa CHC pawh tlawh leh nghalin damdawi chi hrang hrang a pe a, Hospital sak thatna tur hmunhma enin Medical Officer Dr. C. Lalhmingmawii leh thawktu dangten an lo dawngsawng a ni.

Comments

Popular News (Last 30 Days)

Vawiin-ah HSSLC Exam result