Aizawl-a Parking harsatna sukiang tura sawrkar in hma a lak zel tur thu Chief Minister in a sawi

Chief Minister Zoramthanga chuan sawrkar in PAHOSS Scheme a kalpui chu hripui leng in a thlen sum indaihlohna avanga tum anga kalpui theih a nih loh thu sawiin, boruak ziaawm zelah parking harsatna sukiang tura sawrkar in hma a lak zel tur thu a sawi.

Aizawl Two Wheeler Taxi Association (ATTA) General Assembly vawi 5-na nimin-a Aizawl Vanapa Hall-a neih a hmanpuina ah Chief Minister Zoramthanga chuan Aizawl khawpui chu khawpui thenkhat anga a tir atanga mumal leh felfai taka duan lawk thlap a nih loh avangin sawrkar leh mi thahnemngai te'n theihtawp chhuah mahse kawng indaihlohna leh lirthei dahna parking space a that tawklo thu a sawi a, sawrkar in PAHOSS Scheme a kalpui chu hripui leng in a thlen, sum indaihlohna avanga tum anga kalpui theih a nih loh thu leh boruak ziaawm zelah parking harsatna sukiang tura sawrkar in hma a lak zel tur thu sawiin, Two Wheeler Taxi chu khawpui chhung thang zel leh kawngpui tawt zelah mipui tan an tangkai thu a sawi a. Lirthei khalhtute chu fimkhur zui zel tur leh ruihtheih thil a buai lo turin a chah bawk.

Chief Minister chuan Mizoram chu kan ram neih chhun a ni tih sawiin, a chhunga cheng ten kan siam nawm leh kan nuam in, kan chei nawm loh leh kan nuamlo mai dawn a ni tih a sawi a. Ram siamthat kawnga mitin kan pawimawh thu tarlangin, tunlaia kan ram hmelma lian ber pakhat ruihtheihthil ram thenawm atanga lo lut do chungchangah Sawrkar leh mipui, pawl hrang hrangte theihtawp chhuah a ruihhlo do hna thawka kan tan tlan a ngai tihh thu a sawi a. Mizoram chu ram entawntlak leh ram nuam a siam tur chuan hospitality lamah te hma kan sawn belh zel a tul thu a sawi bawk.

Report-a a lan danin tunah hian ATTA member 2,500 awmin AMC in a duan angin Two Wheeler Taxi stand awm zat chu 50 a ni a. He hunah hian Tourism Department leh Traffic Police ataangin thusawi ngaihthlak a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man