Serchhip-ah Poshan Pakhwada kharna hun Addl. DC hovin hman a ni
Ministry of Women & Child Development ruahmanna anga Poshan Pakhwada, 2023 kharna hun Serchhip DC Meeting Hall-a neih ah hian Bawrhsap mawhphurhna la mektu Lalmuansanga Ralte chuan Poshan Pakhwada Forthnight chu thawktute inpekna zarah tluang taka hman a nih thu leh lawmawm a tih thu a sawi a. Ministry of Women & Child Development in District Level-a naupang leh hmeichhe chaklo zawkte chawikan nana a hmalaknate mitinin lo hria se, lo hmang tangkai se a duh thu sawiin, heng atana sum lo kalte hi thawklehkhatah a pung thut dawn lova, chuvang chuan engtinnge tangkai zawkin kan hman theih ang tih pawh ngaihtuahin thawktute pawhin tan la thar zel turin a chah bawk.
Social Welfare Department thlazar hnuaia hmalakna chi hrang hrang awm te, hmeichhe naupang enkawlna lam te, hleilena tuar hmeichhiate tluk luhna tur One Stop Centre te pawh mipuite pawh kan hmelhriat chho zel tih Addl. DC chuan sawiin, chutih rual chuan enkawl tur mi tam tak kan nei lo hi thil lawmawm lam a ni thung tih a sawi a. “Khawtlang kan inenkawlna a tha a ni tih a hriat a, Kristianna hian kan nun hi a khalh ngil niin a hriat a, a lawmawm hle a ni,” a ti bawk.
Poshan Pakhwada kharna hun hi Serchhip ICDS Project-a CDPO Caryll Lalpari chuan kaihruaiin James Lalremliana, District Coordinator, Poshan Abhiyan chuan Serchhip District-a Poshan Pakhwada chhunga hun an hman dan hrang hrang a tarlang bawk a ni.
Aizawl-ah pawh Poshan Pakhwada, 2023 kharna hun hi Social Welfare & Tribal Affairs Development Minister Er. Lalrinawma hovin MRB Head Office Conference Hall-ah neih a ni a, Anganwadi Training Centre buatsaih, Millet Based Food e-Book chu Minister hian a tlangzarh nghal bawk a ni.
Comments
Post a Comment