YMA in pawisa kawng bo nia lang chhui an duh

Central YMA chuan tunhnaia YMA hnena sum pekchhuah nia sawi leh an dawn inmil lo chu chhuichhuah ngei nise an ti.

Nizan hmasa a Central YMA Central Executive Committee (CEC) thukhawm chuan ZONET Cable TV, Pvt. Ltd. ten RTI hmanga an zawhna Environment, Forest & Climate Change Department in a chhanna a kum 2021-2022 chhunga ramkang venna atana Branch YMA leh Joint YMA te hnena CAMPA sum an pekchhuah zat leh YMA lam dawn in millo chungchang chu ngaihtuahin, hetianga ramkang venna atana sum pekchhuah leh an dawn in millo awm hi an ngai thutak hle tih an sawi a, Pawisa kawngbo awm nia lang hi chhuichhuah ngei nise, a ti diklotute chungah an phu tawk hremna pe ngei turin thuneitute an phut tlat tih an sawi bawk.

RTI Act hmanga zawhna Aizawl Forest Division-in a chhanna ah hian kum 2021-22 chhung khan nungcha leh ramngaw humhalhna lam hawi puanzarna atan YMA Branch 49 hnenah cheng nuai 12 pekchhuah a nih laiin Zonet-in a biak pawh theih chinah Jt. YMA pathum leh YMA Branch 12 chuan RTI zawhna chhanna a lang, an pawisa dawn tarlan zat chu a takin an dawng lo niin an sawi a. Sesawng Jt. YMA hnenah Rs. 50,000 pek anga tarlan chu Branch pathum ten Rs. 3,000 theuh dawngin Baktawng Jt. YMA leh Thingsulthliah Joint YMA hnena Rs. 50,000 ve ve pe anga sawi pawh Rs. 10,000 ve ve chauh an dawng bawk a ni.

Hetiang thu puanzar a nih hnu hian Saitual Forest RO hlui, tuna pension-a chhuak tawh chuan Saitual Group YMA hnuaia YMA Branch 9 hnena sum an pek kim loh Rs. 2,55,000 chu pein Kelsih leh Falkawn Branch te pawhin Rs. 15,000/- ve ve an dawng bawk a ni.