Synthetic Turf Football Ground thar hawng

Mizoram State Sports Council (MSSC) Sports Complex, Mual-lungthu-a Synthetic Turf Football Ground thar chu nimin khan Sports Minister Robert Romawia Royte chuan a hawng.

Synthetic Turf Football Ground hawnna hunah hian Sports Minister chuan ei leh bar a intodelh tur leh thilsiam tam zawk dekchhuak tur chuan a ram a chengten hriselna tha an neih a pawimawh hle tih sawiin, rilru leh taksa hrisel nei turin Sports Department chuan hma a la mek zel tih a sawi a. Mizoram hmun hrang hrang ah thalaite infiamna tur buatsaih mek zel a nih thu leh thalai ten an chhawr tangkai hle tih sawiin, sawrkarin infiamna chi khat mai nilovin infiamna chi hrang hrang te tihmasawn turin chak taka hna a kal pui mek thu a sawi bawk. Sports Minister chuan Mizoram-a Synthetic Football Turf phah te chu quality tha tak tak te an nih thu sawiin, FIFA Quality Test paltlang tawh te pawh awmin, tuna an phah tak pawh hian FIFA Quality Test a paltlang ngei a beisei thu a sawi bawk.

Mizoram State Sports Council (MSSC) Sports Complex, Muallungthu-a Synthetic Turf Football Ground hi Khelo India Scheme, Ministry of Youth Affairs & Sports,Govt. of India atanga sum hmuh cheng nuai 500 senga siam niin, ACT Global Company,USA te siam a ni a. Football Turf phah chin area hi 110x74 mts niin a hungna, Pavilion leh Paver Block footpath te siam tel a ni bawk. Nimin-a a hawnna hun hi bialtu MLA Prof. F. Lalnunmawia pawhin khual zahawm niin a hmanpui bawk a ni.