Mizoram puma Theka rate hman tur Central YMA in duangin mipuite zawm theuh turin an ngen

Central YMA chuan Mizoram-ah Cement Work hna hrang hrangah hnamdang ten an duh zat zat inchhiarin Theka-in hna an thawk thin tih sawiin, hei hi an veiin tha an tih loh thu an sawi a, mumal taka Theka rate neih theih nan ruahmanna an siam bawk.

Central YMA thuchhuah in an tarlan danin hun rei tak atang khan Mizoram chhunga Theka Rate siam tur hian hmalak a ni tawh a, Mizoram Mistiri Association leh pawl hrang hrangte nen inrawnkhawmin rate mumal tak neih theih nan Theka rate tur hi tihchhuah a ni a. March 6, 2023 (Thawhtanni) zan-a Central YMA Executive Committee thukhawm chuan, Mizoram-ah mumal taka Theka Rate a awm neih theih nan ruahmanna an siam chu mipui ten zawm theuh tur leh hei aia sang a Mistiri chhawr lo turin mipuite a ngen a. Branch YMA tin te pawh an huamchhungah zawm that a nih leh nih loh thlithlai nghal turin hriattir an tichhuak bawk a ni.

Theka rate an siam danin PCC Works-ah chuan Cubic Feet (cu.ft) zelah Rs. 45 a ni anga, RCC Works-ah chuan cu.ft zelah Foundation-ah Rs. 93/-; Column-ah Rs. 140/-; Beam-ah Rs. 135/- leh Slab-ah Rs. 105/- a ni anga. Plinth Area-RCC Works bikah Slab 3 chinah Sq. ft. ah Rs. 140/- leh Slab 3 aia tamah Sq. ft. ah Rs. 190/- a ni ang. Brick leh Plaster a tel a nih erawh chuan Slab 3 chinah Sq. ft ah Rs.. 215/- leh Slab 3 aia tamah Sq. ft. ah Rs. 250/- a ni ang.

Brick a chhawng zawng a rem a nihin Sq. ft. ah Rs. 18/- leh a bawk zawngin Rs. 25/- a ni anga, AAC Block rem man chu Sq. ft. ah Rs. 13/- a ni ang. Plaster man chu Sq. ft. zelah Brick-ah chhung lamah Rs. 17/- leh pawn lamah Rs. 24/- niin AAC Block-ah chhung lamah Rs. 17/- leh pawn lamah Rs. 22/- a ni anga, Ceiling-ah Rs. 20/- a ni ang. Rawng hnawih man chu Cement paint-ah chhung lamah Rs. 4 leh pawn lamah Rs. 5/- a ni anga, Enamel paint-ah chhung lamah Rs. 6/- leh pawn lamah Rs. 7/- a ni anga, Wall Putty chu Sq. ft. ah Rs. 8/- zel a ni bawk ang.

Floor Tile bel man chu a size a zira danglamin Sq. ft. ah Rs. 20 leh 25 a ni anga, Bathroom bang leh chhuat ah Rs. 30/- a ni ng. Marble leh Granite bel man chu Steps ah sq. ft. ah Rs. 120/- leh chhuat ah Rs. 80/- a ni anga, Lung rem chu Sq. ft. ah Rs. 35/- a ni ang. In chung-a Rangva chih man chu Pre-coated Steel Roof (Dyna roof)-ah Sq. ft. ah Rs. 15/- leh Rangva pangngai ah Rs. 10/- a ni anga. Plumbing Works-ah Pipe phum bo lohin point khat ah Rs. 280/- leh phum bo in Rs. 350/- a ni anga. Electric Works-ah phum bo loh in point khat ah Rs. 250/- leh phum bo in point khat ah Rs. 400/- a ni ang.