Lungsen-a Vawk thi ASF nia rinhlelh a ni

Lunglei District chhunga Lungsen khua ah tunhnai khan Vawk thi awm lehin African Swine Fever (ASF) vanga thi nia rinhlelh a ni.

    Kum 2021 March thla-a ASF leng avanga Mizoram-a Vawk thih tanna leh Vawk chan tamna khua Lungsen khua ah tunhnai khan Vawkpui rai lai, Vawkpui no hruai leh Vawk note thi hi awm lehin hei vang hian Vawk vulhtute an mangang ru hle nia thudawn a ni a. Tlabung Senior Veterinary Officer Dr. K. Lalhlimpuia chuan kum 2021-a ASF hri len laia Vawk te kha suat vek an nih loh avang leh Vawk dahna In tih thianghlim that tawk loh awm palh thei a nih avangin ASF hi a la cham a nih an rin thu leh tuna Lungsen-a Vawk thi chu ASF ni ngeia hriat a nih thu a sawi bawk. Hetianga Lungsen-ah Vawk thi a awm leh avang hian AH&Vety Department-a Mobile Veterinary Unit (MVU) Team chuan nimin khan Lungsen hi an pan a ni. Lungsen khua ah hian kum 2021 khan ASF vangin Vawk 800 chuang a thi a ni.