Dilkawn khua ah chenna In 5 kangral vek

Nimin chhun dar 12:00 vel khan Champhai District-a Dilkawn khua ah kangmei chhuak vangin chenna In 5 chu bungrua engmah chuh hman lohin a kangral.

Thudawn danin kangmei hi nimin chhun dar 12:00 vel khan Dilkawn Bangla Veng-a Remruatpuia In atanga intan nia hriat niin Dilkawn khua hian nimin khan Lo an hal avang leh hetah hian mei an tihchhuah palh avanga ram tang rual mipa chu ram lamah kang thelh tura an chhuah deuh vek avangin In kang hi an thelh mit lawk thei lo a, In dang 4- Lalrosiama, Romana, Liantluanga leh Laltlanzauva te In chu kang kaiin bungrua engmah chuh hman lohin a kangral vek a, kangmei chhuah chhan tak hi hriat a ni lo.

Dilkawn khawtlang hian nimin-a lo an halna lama kangmei an chhuah avang hian In kang an thelh mih hnu hian kang thelh turin ram lamah an liam leh nghal a, hei vang hian In kang chungchanga hmalak dan tur hi Dilkawn khawtlang hruaitute chuan he thu buatsaih lai thleng hian an la rel thei rih lo a, Vawiin hian kangmei sulhnu thianfaiin khawtlangin an hnatlang anga, chenna In chan tate in tundin dan tur chu la ngaihtuah leh tur a ni ang.