Thiamloh chantir mi 6 te Bail in chhuah leh rih

Tuirial HEP atana ram lak kaihhnawih thubuaia tunhnaia thiamloh chantir mi 6 te chu March ni 1 thleng bail a chhuah phalsak an ni.

    Special Judge Dr. HTC. Lalrinchhana chuan nimin khan heng mi 6-te bail dilna hi a ngaihtuah a, Bail diltu aiawha ding Ukil te leh sawrkar Ukil te thusawi a ngaihthlak hnuin bail hi a phalsak a. Bail bond leh surety cheng nuai khat ve ve theuh a tuk a. Bail phalsakte hi an zualkona tur Court sang zawkin an chungchang ngaihtuah leh chhung atana bail a chhuah a remti emaw, he Court thutlukna hi a paih emaw a nih loh chuan March ni 1 emaw, a hma lamah emaw Court hma-ah an inpe leh tur a ni, a ti a. Bail a chhuah an nih chhung hian dan bawhchhiatna thil engah mah an inhnamhnawih tur a ni lo, a ti bawk.