Assam Rifles te chhuahna turin theihtawp chhuah

Chief Minister Zoramthanga chuan Aizawl khawpui laili atanga Assam Rifles te an chhuahna turin sawrkarin theihtawp a chhuah tih sawiin, an insawnchhuah kim lek lek tawh niin a sawi.

    Nimin-a Assembly thutkhawm ah Revenue Minister Lalruatkima Bill putluh, ‘The Mizoram (Restriction on use of Transferred Lands) (Amendment) Bill 2023’ chungchang a sawizauna ah Chief Minister chuan Assam Rifles te hi Covid hma khan chhuak vek turin Home Ministry pawhin order an rawn pe tawh tih sawiin, chu Order chu sutna a la awm lo niin a sawi a, chutihrualin, Covid vangin chet hleih theih a ni ta lo niin a sawi.

Chief Minister chuan Assam Rifles te insawn tur hian an Commander te an sawipui bakah Home Ministry lam pawh nawr an ni a, Assam Rifles lamin chhuanlam an ngah a, an chhuanlam tui a ni emaw, kalkawng a ni emaw, electric leh pawimawh dangte chu siam zawh thawkhat tawh a ni a. Union Home Minister Amit Shah chu Mizoram lokal a AR Hqrs. thar hawng tura tih niin, a hun atan Nov. 2022 rawt a ni. Hetihlai hian Gujarat inthlan leh a hnu a inthlan awm chho vangte in Amit Shah chu Mizoram a lokal thei ta lo a ni. Assam Rifles te chu Aizawl laili atanga an chhuah thuai a tul tih Chief Minister chuan sawi bawkin, a chhan lian tak a tarlan ah, Laldenga Cultural Centre atan Smart City atangin cheng vbc. 100 dah a nih thu leh chu chu liam thei a nih thu a sawi bawk.

‘The Mizoram (Restriction on use of Transferred Lands) (Amendment) Bill 2023’ puluttu Revenue Minister Lalruatkima chuan he dan siam thatna tur hi Dan awm sa, The Mizoram (Restriction on Transferred Lands) Act 2002 thlakna tur a ni tih a sawi a, Assam Rifles insawnchhuah chungchangah hian sawrkarin theihtawp a chhuah thu leh, tun atanga hun reilote ah an chhuahsan thuai dawn tih a sawi bawk.