MZP in Chakma Foreigners hnawhchhuah an nih theih nana hmalak an rel

Mizo Zirlai Pawl (MZP) chuan Mizoram chhunga Chakma Foreigners awmte hnawhchhuah a nih theih nan hmalak nise an ti.

    MZP hian nimin khan Lawngtlai District Borapansury khuaa Zofate Chawlhbuk-ah MZP Special Assembly 2023 neiin he thu hi an rel a. An thurel zingah Mizoram chhunga Chakma Foreigners awmte hnawhchhuah a nih theih MZP-in hmala rawh se tih bakah hian Mizoram chhunga hnamdang dan loa sumdawngna kalpui mekte MZP in dapchhuaha Mizoram sawrkar-in tihtawp a nih theih nana hmalak te; Kum 2019-a Mizoram Legislative Assembly-in a lo passed tawh, Mizoram Governor-in a pawmpui loh, ‘The Mizoram Maintenance of Household Register Bill 2019’ a hlawhtlin theih nana hmalak te; Kan Mizo nunphung leh kan history te a tam thei ang ber zirlaibu-ah telh a nih theih nana hmalak te leh Mizoram zirna In hrang hrang School, Hostel Fees leh Facilities a inmil em tih zirchiangin a tul anga hmalak te a tel a ni.

MZP Special Assembly 2023-ah hian MZP President Lalnunmawia Pautu chuan, Ram in chhan a ngaih chuan, “MZP khawiah nge a awm?” tih a ni fo thin tih sawiin, “Kan ram leh hnam tan MZP hi kan ding tlat tur a ni,” a ti a. “Borapansury hi CADC chhung Mizoram chhung ngei a nih avangin ram chhan nan leh hetiang laia Zofa zin veivakte chawlh hahdam nan MZP hruaitu hmasa ten hetiang laiah Zofate Chawlhbuk an lo din a, a hlu takzet a ni,” a ti bawk.

MZP Special Assembly-ah hian MZP General Hqrs., Sub-Hqrs. leh Branch bakah College SU leh Hnampual zirlai pawl aiawh te an tel a, Rorel zawh hnuin MZP hruaitute leh Borapansury VC te chuan inkawmna neiin Borapansury leh a chhehvel a Chakma Foreigners, a ruka Mizoram a lo lutte chungchang leh hmalak ho dan tur an sawiho nghal a ni.