Serchhip District Football Championship 2023-ah Semi Final khel tur a hriat ta
Serchhip Sports Complex-a District Football Championship khelh mekah hian nimin khan inkhel hmasa berah Group C atangin Chanmari FC chuan Chhekhnai FC chu 5-2 in an hneh a, Chanmari FC tan Lalram-tiama chuan goal thum khungin B. Lalruatpuia leh Lalthangmawia ten goal khat ve ve an khung bawk a ni. Group C-ah hian Chanmari FC leh Vengchung FC ten point 4 ve ve hmuin Chhekhnai FC in point an hmu lo a, point 4 hmu pahnih-ah Goal Difference-a tha zawk Chanmari FC in Semi Final an lut a ni.
Nimin-a Group A inkhel ah FCSerchhip Kawnpui chuan El Ocho FC North Vanlaiphai chu 10-3 in an sawp bawk a, FC Serchhip Kawnpui tan Vanlalthanga chuan goal 4 a khung bakah V. Lalremruata leh Lalrawngbawla te chuan goal hnih ve ve an khung a, Felix Lalruatsanga leh G. Darthanmawia ten goal khat ve ve khung bawkin El Ocho FC tan F. Lalhriatpuia, Lalnunpuia leh Remsangpuia ten goal khat theuh an khung bawk. Group A-ah hian FC Serchhip Kawnpui leh Kawn Veng FC ten point 4 ve ve hmuin El Ocho FC in point an hmu lo a, point 6 hmu zinga GD tha zawk FC Serchhip Kawnpui in Semi Final an lut a ni.
Nimin-a inkhel hnuhnung berah Group B match hmasa a goal 16 khung thei ve ve Thangzuala Memorial FC (Thenzawl) leh Hmar Veng FC te inhmachhawnin Hmar Veng FC hi 4-3 in an chak zawk a, Hmar Veng FC tan Suanneihmuana, Lalhruaizela, Lalhunthara leh Lalpekhlua ten goal khat theuh khungin Thangzuala Memorial FC tan Lalhmingliana Kawlni chuan goal hnih a khung bakah Ramsangpuia chuan goal khat a khung bawk a ni. an Group-ah hian Hmar Veng FC in point 6 hmuin Semi Final an lut a Thangzuala Memorial FC in point 3 an hmu a, Sialsir in point an hmu lo thung.
Group tina pahnihna zingah Vengchung FC chu an dinhmun tha berin Semi Final an lut bawk a, Vawiin hian inkhel a awm dawn lova, naktuk-ah Semi Final khelh tura ruahman niin chawhma dar 11:00-ah FC Serchhip Kawnpui leh Vengchung FC inhmachhawnin chawhnu dar 1:00-ah Hmar Veng FC leh Chanmari FC an inhmachhawn ang.