Mizoram-ah LPG leh Buhfai dinhmun a tha

Zonuna Kawlni (LENKAWL) • February 11, 2023 • Comments • Mizoram

Mizoram chuan tun dinhmunah nitin eirawngbawlna Gas (LPG) Truck trip 23 a dawng mek a, buhfai chhekkhawl pawh Mizoram in a ngah tawk thu Supply Minister K. Lalrinliana chuan a sawi.

Nimin-a Assembly thutkhawm zawhna leh chhanna huna Member te zawhna leh zawhbelhna te chhangin Supply Minister K. Lalrinliana chuan, kum 2019 khan Chief Minister Zoramthanga remtihna angin sawrkar laipui-a Petroleum Minister a dawr tih sawiin, an harsatna te an thlen tih a sawi a. Tunhma lamin nitin LPG Truck trip 15 (trip khat ah gas bur 310 vel) Mizoram in a dawng thin tih sawiin, “Chawhrualin trip 20 a nih chuan kan kham ang kan tih laiin, nitin trip 23 in dawng ziah tawh ang tih min tiam a, chu chu tun thlenga kan dawn dan a la ni,” a ti bawk.

Supply Minister tarlan danin, tun dinhmunah chuan Mizoram-ah buhfai chhekkhawl a tam tawk a, Mizoram pumah buhfai stock qtls. 170117.08 awm mekin Fur lo thleng tur atan inchhekkhawl dan tur pawh ruahman a ni tawh bawk a ni.