Govt. Serchhip College Administrative Building sa turin tun thla ah lungphum phum a ni dawn
Nimin-a Mizoram Legislative Assembly inkhawm zawhna leh chhanna hunah Serchhip bialtu MLA Lalduhoma zawhna H&TE Minister in a chhanna kal zelah Chief Minister Zoramthanga chuan Govt. Serchhip College Administrative Building sakna tur hian a tirah cheng nuai 1000 vel ngai tura ngaih a nih thu a sawi a, amaherawh chu Principal ten nuai 650 velin daiha an hriat avang leh Project pawh neia nuai 650 pek an nih chuan tha an tih avangin SASCI-ah dah a nih thu a sawi a. Tunah hian PWD in Contractor tur thlang fel tawhin tun thla ni 18 khian a lungphum phum turin Programme siam a nih tawh thu Chief Minister chuan a sawi a ni.
Nimin thutkhawm ah hian Serchhip bialtu MLA Lalduhoma zawhna chhangin Higher & Technical Education changtu Minister Dr. R. Lalthangliana chuan Serchhip bial bye-election neih dawn, April 2021-a Chief Minister in Govt. Serchhip College a tlawh tuma Administrative building sak thatna tur cheng nuai 1000 a tiam chu NEC-ah Concept note leh Detailed Project Report thehluh niin NEC in a ti hlawhtling lo tih a sawi a. April 14, 2022-a Govt. Serchhip College in ‘A’ Grade an hmuh lawm ni-a Chief Minister in hemi atan veka cheng nuai 650 a tiam leh chu SASCI hnuaiah kaltir a nih thu H&TE Minister chuan sawiin, Govt. of India Approval hmuh a nih tawh thu leh pawisa dah a nih thu a sawi a. State sawrkar-a Administrative Approval leh Expenditure sanction buaipui mek a nih thu a sawi a. A pawisa hi Higher & Technical Education Department kutah awm lovin PWD-ah transfer a nih thu a sawi bawk.
Serchhip bialtu MLA chuan Govt. Serchhip College hian Teaching Staff-ah Minimum Faculty pawh a nei zo lo nia sawiin, Science-ah pawh zirtirtu an nei lo niin a sawi a. Hemi chungchang hi H&TE Minister Dr. R. Lalthangliana chuan sawi chhunzawmin Faculty indaihlohna hi an hriat thu leh College tin te chu Department hrang hrangah Zirtirtu leh zirlai awm zat te an chhut nasa hle tih a sawi a, Pension te leh thi bakah thildang dang avanga Post ruak engemaw zat awm chu sawrkar kum thar-ah Chief Minister in a pe thei dawn nia an hriat thu leh hetah hian Govt. Serchhip College pawh an lo hre tel tura ngaih a nih thu a sawi a. Kum 2019 vela Post ruak hnawhkhahna tura ruahmanna an siam chu Covid nghawng avangin tam tak kalpui theih loh in a nghawng thu a sawi bawk.