SEDP-a tanpuina sem tawh hlawhtlinpui tham a nih loh avangin sem belh zel tum a ni

Chief Minister Zoramthanga'n SEDP sem meka 1st leh 2nd installment a Rs. 50,000/- sem chu hlawhtlinpui tham a nih loh avangin sem belh zel tum a ni tih House a hrilh a. SEDP dawngtute hmalakna chu a mawhphurtu ten an la endik dawn tih a sawi bawk.

Nimin-a Mizoram Legislative Assembly Budget Session zawhna leh chhanna huna Aizawl South-I bialtu MLA C. Lalsawivunga zawhna leh zawhbelhna dangte a chhanna ah Finance changtu Chief Minister Zoramthanga chuan SEDP thawh khatna sem mekah 1st installment a Rs. 25,000/- an pek chu hlawhtlingpui tham a ni lo a, hei hi Sawrkar kum khat chhunga sem tura ruahman zatve chauh a ni tih a sawi a, SEDP dawngtute chu Sawrkar kum kal mek chhungin 2nd installment Rs. 25,000/- dang pek leh tur an ni a, hei pawh hi hlawhtlin pui thama an ngaih loh thu leh pek belh leh zel an tum thu a sawi a ni. Chief Minister Zoramthanga chuan, SEDP Phase 2-na pawh an dawng leh dawn tih sawiin, sanction pawh tihfel vek tawh a nih thu a sawi bawk.

SEDP la dawng lo mi thar pek tum an nih leh nih loh zawhna chhangin Chief Minister chuan tuna chhungkaw 60,000 sem tawh te bak chhungkaw dang, a sing bi hnenah Sawrkar kum thar lamah sem leh an tum tih a sawi a. SEDP dawngtute hmalakna dan endik tura Social Audit neih chungchang zawhna chhangin Chief Minister chuan, a mawhphurtuten an la endik dawn tih sawi bawkin, tunah hian 2nd Instalment pawh pek an la nih loh avangin an dawn hnuah a tul anga Department in Training pein hmalak a nih dawn thu a sawi bawk a ni.

Chief Minister sawi danin, chhungkaw lam hawia SEDP kalpui mekah chhungkaw 59,996 hnenah 1st installment sem a ni tawh a, Tourism Department hnuaia Tourist Guide trade thlangtu chhungkaw 4 chu Tourism Department in training an buatsaih laia an training hman loh avangin pek an la nih rih lo a, Training hi buatsaih leh thuai beisei a ni.

Chhungkaw lam hawia SEDP kalpui mek hi Department 9 hnuaia kalpui a ni a, chung te chu Agriculture, Horticulture, AH & Vety, Fishery, Sericulture, Land Resources, Soil & Water Conservation, Commerce & Industries, UD&PA leh Tourism department te an ni.