MNF atanga banna thehlut a takah tlemte niin sawi

MNF Vice President Lalthlenglina chuan Siaha-a MNF bansan-tute chu a takah an tlem hle niin a sawi.

    Siaha-a zin MNF Vice President hian nimin zing khan MNF District Headquarters Siaha huaihawt ‘Street Campaign’ leh MNF Party Office-a ‘Woker's Meet’ ah thu sawiin, “A hmunah ka kal chilh a, banna an thehluh document-te ka zirchiang a, Social Media-a kan lo hmuh ang ringawt ni lovin Siaha-a MNF bansantute hi a takah an lo tlem hle a, MNF kan la tam filawr ber a, kum 2023 MLA inthlanah he laiah leh Zoram pumah MNF kan tling leh ngei dawn,” a ti a. “Tuna banna lehkha rawn thehlut tam ber hi a hma MDC inthlan laia kan party phatsantu leh kan party-ten party enrollment-a an telh loh, party atanga hnawhchhuah sa te an ni a. Min eptu tlemtein kan party beih nan, mipui tih chi-ai nan thudik tawk lo an vawrh darh mai mai a lo ni,” a ti a. “Tuna banna thehlut nia dawt an phuahchawp zat aia tam fe chu MNF-a lawmluh mai hmabak kan nei,” tiin MNF party atanga chhuak reng reng politics-a ding chhuak an awm lo niin a sawi bawk.