I Electric bill I chawi dik leh dik loh chhut rawh le
Consumer te i harh ang u -XXXVIII :
I Electric bill I chawi dik leh dik loh chhut rawh le
- Laldinpuia, Secretary
Electric bill sang chungchangah hian tunlai hian sawi a tam hle mai a, kan bill san avangin tam tak kan phun kan phun a, a thawktute kan dem a, thenkhat phei chuan thil hre chiang mang lovin, “Sawrkarin SEDP tuak nan a hmang a niang,” te an han ti leh ngawt thin a. Rin thua zeldin chiam emaw, hrechiang mang hlei lova tu emaw dem vak ai chuan thil nihphung kan hriat hmasak phawt hi Consumer tena kan tih tur a ni. Chuvang chuan kan Electric Bill sang hi a dik reng em? tihsual a awm em? tih awlsam taka chhut dan lo tarlang dawn ila.
Tuna Electric bill tariff kan hman mek hi 2022-2023 tariff a ni a, hetiang hi mipui nawlpui ina kan hman Domestic connection bika a rate awmdan chu a ni –
1) Unit 0-100 inkar kan hman man hi Unit khat zelah Rs. 4.90/- a ni.
2) Unit 101-200 inkar kan hman man hi Unit khat zelah Rs. 7.10/- a ni.
3) Unit 200 leh a chunglam zawng hman man hi Unit khat zelah Rs. 8.20/- a ni.
4) Connection tinah Contracted Load hi Rs. 50 per kW zel chawi tur a ni. Kan Electric bill ah khan a veilamah contracted bill a awm a, khata inziak leh Rs. 50/- puntir tur a ni.
5) Meter box hi Department atanga kan hawh anih chuan Rs. 20/- zel thla tin kan chawi a ngai a, keimahni sum senga kan lei anih erawh chuan rental chawi a ngai lo thung.
Khing tarlan rate hmang khian awlsam takin kan Electric bill chawi zat hi a hriat theih a ni.
Kan bill chawi zat tur i han chhut chhin dawn teh ang :
Kan Electric Bill a Contracted Load tih hnuaiah khan reading hrang hrang a awm a, Present Reading atanga Previous Reading kha paih tur a ni. Khami paih chhuaka kha a hnuaia Slab hrang hrang hmang khan bill chhut a ni ta a ni.
Entirna 1-na : Contracted load kha 0.50 kw ni ta se, unit consumed kha 27 ni ta se. I bill chawi zat tur chhut dan chu hetiang hi a ni ang – Contracted load 0.5 leh Fixed Charge Rs. 50 i puntir ang a, i unit chawi zat 27 leh Unit 1 hman man Rs. 4.90 i puntir bawk ang. Chumi chhuak pahnih chu i bill chawi zat tur chu tihna a ni. (0.5xRs.50=Rs.25; 27xRs. 4.90 = Rs. 132.3; Rs. 25+Rs.132.3 = Rs. 157.3 hei hi I bill chawi zat tur a ni.
Comments
Post a Comment