District Bawrhsap in kangmei veng tha ber District ni tura theihtawp chhuah turin mipuite a sawm
Serchhip District-a Fire Prevention Week hawnna Serchhip DC Conference Hall-a neih ah hian Bawrhsap Nazuk Kumar IAS chuan ram kang hian thil tha engmah hrinchhuah a nei lo tih sawiin, “Kan rohlu neihsa te min chhuhsak thin zawk,” a ti a. “Ram kan duhzual hun hi Fur lo thlen hma thla li chhung vel a ni ber a, hemi chhung chauh hi chu khawtinten nasa takin, fimkhur takin kan ramte i thlithlai ang u,” tiin “Kumin hi boruak a kal dikin kangmei a chhuah loh nan kan dinhmun a tha dawna ka hriat avangin kan invena kangmei kan tihchhuah loh nan ka tawngtai a ni,” a ti. Bawrhsap chuan Industry lamah kan la san loh avangin Lo neia eizawng kan la tam tih pawh sawiin, “Lo hal hun kan bithliahte tha taka zawmin, Lo hal turten tha takin Mei kawng kan sial ngei bawk dawn nia. Hei hi thupeka tihchhuah a nih avangin a zawm lote chuan hremna an hmachhawn dawn a ni,” tiin, Lo leh Huan hal hun bituk zawm theuh turin mipuite a chah a. Serchhip District in kum kalta ah kangmei veng tha ber lawmman kan lakna leh a hnu zela hna kan thawhzuinaah te kha mahni emaw, min tlemte te thawhchhuah theih a ni lo tih sawiin, “Kan District chhunga mitinte inpekna leh thawhhona tha tak vang a ni a, Vawiin-ah hian lawmthu ka sawi thar leh a ni. Kumin ah pawh pakhatna ni leh thei tura theihtawp chhuah tlang leh turin ka sawm cheu a ni,” a ti bawk.
Serchhip Sub-Hqrs. YMA Secretary PC. Vanlalluna kaihhruai he hunah hian Thenzawl DFO leh District Fire Prevention Committee Member Secretary Lalbiakchama Chawngthu chuan Forest Survey of India in kum hnih dan zela zirchianna report a siam, a hnuhnung ber kum 2021-a siam ang chuan Mizoram ramngaw in a khuh zau zawng chu 84.53% a ni a, ngaw chhah bik chin chu 0.74% chauh niin heng hmun te hi kan humhalh bik Murlen, Thorang, Zongaw, Phawngpui ang chite an nih thu leh Open Forest khuh chin chu 56.68% a nih thu a sawi a. Heti chung hian India rama ramngaw nei tha ber State kan la nih thu leh kan ramngaw leh a chhunga cheng nungchate nasa zawka humhalh anih theih nan kum 2000 khan State Level Fire Prevention Committee leh District Level Committee din niin anni hmalakna hian Kangmei Ven Hapta hi kumtin hman a nih thu leh kumin hi a tum 24-na a nih thu a sawi bawk.
Thenzawl DFO chuan kum 12 kalta chhunga Serchhip District dinhmun bikah 16.08 sq km chu ngaw chhah bik la awmin, District 11 zinga a nei tlem ber Champhai District dawt kan nih thu a sawi a. Tunah hian Forest Survey of India report 2023 buatsaih leh mek niin Forest Survey of India hian kangmei chhuak report hi Satellite atanga an en reng thu a sawi a, kumin a kangmei venna Hapta chhunga an hmalakna turte a tarlang bawk.
Kumin a Fire Prevention Week-ah hian ‘Thapui thawhin kangmei chhuak tur i veng ang u’ tih chu thupui-ah hmangin Serchhip District VC Association President Lalzuiliana chuan ramkang a awmin 'A ram neitu ten thelh mai rawh se' tih ngaihdan a awm thin thu leh amah-erawh chu Kangmei a chhuah tawh chuan mi pakhat ram mai ni lo, ram zau tak a kan thin avangin mipa puitling tawh phawt chu kang thelh tura kan thawhchhuah thin a tul thu a sawi a. He huna kalkhawmte hian ram tikang lo tur leh midang te zirtir turin thu an tiam rual bawk a ni.
Comments
Post a Comment