SEDP thawh khatna kalpui mek chu March thla tawpa sem zawh hman tum a ni

Ni 22 chhung awh tur Mizoram Legislative Assembly Budget Session chu nimin khan neih tan a ni a, Governor Dr. Hari Babu Khambampati chuan State Sawrkar Flagship Programme, SEDP thawh khatna kalpui mek chu March thla tawpa sem zawh hman tum a ni tih House a hrilh.

Mizoram Legislative Assembly 8-na thutkhawm vawi 11-na hi nimin khan Assembly House-ah Speaker Lalrinliana Sailo kaihhruaiin neih tan a ni a, nimin-a inkhawm tan a nih veleh Governor Dr. Hari Babu Khambampati chuan member te hmaa thu sawiin Sawrkar hmalakna hrang hrang a tarlang a, chhungkaw lam hawia SEDP thawh khatna kalpui mekah chhungkaw 60,000 hnenah Rs. 25,000/- theuh pek a ni tawh tih sawiin, hemi atan sum senral zat chu cheng vbc. 150 zet a tling tih a sawi a. Tunah hian Second Instalment pechhuak leh turin thil tul hrang hrangte buaipui mek a nih thu leh a hmaa lo dawng tawh chhungkaw 60,000 te hnenah Rs. 25,000/- theuh pek a ni leh dawn tih a sawi a ni.

Larsap chuan a kaihhruai Mizoram Sawrkar-in ram venhimna kawngah theihtawp a chhuah tih a sawi a, kum liamta chhung khan dan leh thupek kenkawhna kawngah harsatna liantham thleng a awm lo a, ramri-ah pawh harsatna thleng a awm lo chu thil lawmawm tak a ni tih sawiin, Mizoram leh Assam ramri-a Duty Police te mamawh hrang hrang siam nan Sawrkar-in cheng nuai 327.56 zet a ruahman tih a sawi a. Mizoram-ah hun engemaw chen Covid-19 hri kai hmuh a ni tawh lo chu thil lawmawm tak a ni tih pawh Dr. Hari Babu Khambampati chuan a sawi a, hriselna leh mipui nunphung chawikawn kawngah Sawrkar-in theihtawp a chhuah a, kum liamta 2022 chhung khan NABARD atanga sum hmuh cheng nuai 2,955.34 hmangin Primary Health Centre pakhat chei that a nih bakah Sub-Centre 30, Isolation Ward 19 leh Medical Quarters 23 sak a nih bakah State Drugs Testing Laboratory sak chu nikum November ni 18 khan hawn a ni tih a sawi bawk.

Governor in thu a sawi zawh hnu hian Champhai North bialtu MLA, Dr. ZR. Thiam-sanga chuan Larsap thusawi chungchanga lawmthu sawina Motion a pulut a, hemi hnu hian Speaker Lalrinliana Sailo-in Assembly Budget Session neih chhunga Panel of Chairman atan mi 4 - Dr. L. Thangmawia, Lalrindika Ralte, Zothantluanga leh K. Laldawngliana te ruat an ni tih a puang a, hemi hnu hian Vawiin a chhunzawm leh turin nimin-a thutkhawm hi tihtawp zui a ni a. Larsap thusawi chungchanga lawmthu sawina Motion putluh hi Vawiin ah sawihona neih a ni ang.