Kum 2020 atangin Mau tiak 8,49,425 sem tawhin a leina atan Rs. 6,48,16,750/- sen a ni tawh

Horticulture Department chuan kum 2020 atang khan loneitute hnenah Mau tiak chin tur 8,49,425 a sem chhuak tawh a, Mau tiak leina atan Rs. 6,48,16,750/- hman a ni tawh a. Mau chintir atang hian tharchhuah la awm lovin Mau thar te hralhna turin Department in ruahmanna a la siam lo bawk.

RTI hmanga a zawhna, Horticulture Department Directorate SPIO-in a chhanna atanga a landanin, loneitute hnenah hian Mau chi (species) pathum chintir niin, Dendrocalamus Brandisii, Dendrocalamus Sikkimensis leh Dendrocalamus longispathus-te chintir an ni a, Mau tiak hi kum 2020 atangin loneitute chin tura pekchhuah tan niin, kum 2020-ah tiak, 84,000 semchhuah a ni a, kum 2021-ah tiak 2,50,425 leh kum 2022-ah tiak 5,15,000 sem chhuah a ni a, Mau tiak lei tawh semchhuah loh a awm lo a ni.

Mau chite hi State chhunga Nursery-te atanga lei niin, Mau tiak leina te hi Mizoram Bamboo Producer (MBP), Bairabi Bamboo Nursery (BBN), Rokunga Kawlremi and Sons (RKS) leh Inter-State Marketing Cooperational Services (IMCS)-te a ni a, Mau tiakte hi a chi (species) a zirin a leina man a inang lo a, Brandisii hi tiak pakhat Rs. 80/- zela lei niin, tiak 3,44,875 lei nan Rs. 2,75,90,000/- sen a ni a, Sikkimensis hi Rs. 70/- zelin tiak 1,22,900 lei a ni a, chumi atan chuan Rs. 86,03,000/- sen a ni a, Sikkimensis vek hi pakhat Rs. 75/-in tiak 2,85,400 lei a ni bawk a, hemi atan hian Rs. 2,14,05,000/- sen a ni a, Longispathus hi pakhat Rs. 75/-in tiak 96,250 lei nan Rs. 72,18,750/- sen a ni bawk. Mau tiak leina firm/supplier/Nursery zingah MBP hnen atangin lei tam ber niin, anni hnen atang hian kum 3 chhungin Mau tiak 4,38,275 lei a ni a, BBN hnen atangin Mau tiak 1,68,200, ICMS atangin Mau tiak 1,64,200 leh RKS hnen atangin Mau tiak 78,750 lei a ni tawh bawk.

Loneitu Mau chintirte hi Mau tiak pêk an nih bakah sum pek tel an ni a, sum pekchhuah dan hi Scheme a zirin a inang lo a, an chinna ram zau zawng mila pekchhuah a ni bawk. Model Bamboo Plantation under SEDP-NBM Convergence 2019-2020-ah hactare khat zel atan Rs. 1,13,761/- anga pek a ni a, a kum lehah SEDP hnuai atanga a enkawl zuina turin (2nd Year Maintenance Model Bamboo Plantation under SEDP 2020-2021)-ah Rs. 35,000/Ha anga pek leh an ni bawk.

SEDP 2020-21-ah Bamboo Plantation bultanna turin (Establishment of Bamboo Plantation under SEDP 2020-21)-ah Rs. 1,30,000/Ha anga pek an ni a, NEC 2020-21 hnuaiah (Bamboo Development Project in Mizoram under NEC 2020-21)-ah Rs. 87,500/Ha anga pek tel niin, a kum lehah a enkawl zuina atan (2nd Year Maintenance of Bamboo Plantation under SEDP 2021-2022)-ah Rs. 3,500/Ha anga pek chhuah a ni bawk.

Mau chinna atana Horticulture Department-in sum a hman tawh zawng zawng hi cheng nuai 1,752 a ni a, NMB hnuaiah kum 2018-2020 inkarah cheng nuai 174.60 hman a ni a, NEC hnuaiah 2020-2021-ah cheng nuai 1,114 leh SEDP hnuaiah kum 2019-2022 chhungin cheng nuai 463.40 hman a ni tawh bawk.

Mau tiak hi Mamit District-ah chintir tam ber niin tiak 3,30,125 pek a ni a, Serchhip District-ah chintir tlem ber niin, tiak 1,000 chin a ni a, Serchhip District-a chintir hi Sikkimensis niin, Bungtlang-ah mi pathum leh E. Lungdar leh Biate-ah mi pakhat ve ve 200 theuh chintir an ni.

Mau hi chintir mek lai a nih avangin production a la awm lo a, kum 4-5 hnuah production a awm theih beisei niin tharchhuah a la awm hma chu Mau hralhna turin Department-in ruahmanna a la siam rih lo tih a tarlang bawk.