Central YMA in Bangladesh atanga raltlan te tlawhin thlamuang taka awm turin an chah

Central YMA hruaitute chuan nimin khan Bangladesh atanga Mizo hnahthlak unau, sahimna zawnga India ram rawn tlanlut te an chenna hmun, Parva leh Vathuampui-ah an tlawh a, Raltlante chu an tih theih chinah theihtawpa tanpui an inhuam thu hrilhin, thlamuang taka awm turin an chah.

Raltlan te tlawhtu Central YMA hruaitute leh Sub-Hqrs. YMA Lunglei-a hruaitute hi Tuichawng Group YMA leh Branch YMA hruaitute bakah khawtlang hruaituten lo dawngsawngin Parva-a Vantlang inkhawmah Central YMA President R. Lalngheta chuan, Sahimna zawnga Mizoram lut te thlamuang taka awm turin a chah a, YMA, Sawrkar leh Mizo mipui ten an tih theih chinah theihtawpa tanpui an inhuam thu a sawi bawk.

Central YMA hruaitute hian Parva-ah hian BSF te pawh kawmin raltlan dinhmunte leh an harsatna te an sawipui a, manganga sahimna zawnga India pan te harsatna siam sak lo tur leh tanpui zawk turin an ngen bawk.

Central YMA hian mipuite thawhkhawm atangin raltlan te tanpuina, Mutbu, Silpouline, Emergency light, Camp-a hman tur Electric bungrua, Solar Light, Charger leh a dangte bakah pawisa cheng nuai hnih an hlan nghal a, heng te hi Parva-ah Rs. 45,000/-, Vathuampui-ah Rs. 30,000/-, Chamdur P-ah Rs. 40,000/-, Mautlang-ah Rs. 30,000/-, Hmawngbu-ah Rs. 30,000/- bakahTuichawng Group YMA hnenah Rs. 20,000/- leh Pastor Sawmkhupa ralna a fanu hnenah YMA hmingin Rs. 5000/- te a ni.

Central YMA hruaitute hi nizan hmasa khan Chawngte ah riakin Chawngte Group YMA leh Branch hruaitute nen inkawmna an nei bawk a. Central Young Chakma Association (CYCA) hruaitute pawhin Central YMA hruaitute hi an lo kawm bawk a, Central YMA President R. Lalngheta chuan CYCA hruaitute chu raltlante lo puihna kawngah theihtawpa tang ve zel tur leh an tana harsatna siam zawnga che lo turin a ngen bawk.

Central YMA atang hian President R. Lalngheta leh Asst. Secretary Prof. Malsawmliana te bakah CEC member mi 8 an kal a, Sub-Hqrs. YMA, Lunglei hruaitu ten an tawiawm bawk a ni.

Comments

Popular posts from this blog