RBI hotuten Mizoram Governor an kawm

Reserve Bank of India (RBI) Office, Aizawl-a Officer-in-Charge P. Shimrah leh Mizoram Rural Bank (MRB) Chairman V. Jaya Chandra bakah RBI Officer dang ten nimin khan Governor Hari Babu Kambhampati kawmin Bank hmalakna chungchang an sawiho.

    Raj Bhavan-a inkawmna ah hian Governor chuan Mizoram-ah Bank hmalakna tur a la tam thu sawiin, mipui nawlpuiin Welfare Scheme, Social Security Scheme, Loan puk theih chungchang leh an Bank Account kaihhnawih Banking Services an dawn theih tur chungchang te chiang zawk a hriat an la mamawh tih a sawi a, Bank hnathawk ten tan an lak chhunzawm a la ngai hle a ni, a ti. Tunhnaiah SLBC report a lo thlir thu sawiin Governor chuan, hemi report ah hian Social Security Scheme leh Welfare Scheme thenkhata inziaklut an pung tih a hmuh thu a sawi a, he hmasawnna hi Bank hnathawk te tanlakna rah a ni tih sawiin, Bank hnathawk ten tan an lak chhunzawm chuan hei aia hmasawnna lian zawk hi a beiseiawm tih a sawi bawk.

He hunah hian Bank Official te chuan February thla chawhma ah Financial Literacy Week (FLW) hman an tum thu Governor hi hrilhin, FLW hawng tur leh a hawnna inkhawmah khuallian atan an sawm nghal a. Governor chuan Financial Literacy Week hman chhunga hriat tura a duh te sawiin, Loan te nau mamawhtu Aizawl khawpuiah ringawt pawh hian tam tak an awm mek thu leh heng sumdawng tenau - Hawker, chawhmeh zuar leh a dang te zingah hian Rs. 50,000 atanga Rs. 10,00,000/- thleng lak theihna Mudra Loan te hi an hriatchian chuan puk mamawh leh duh tam tak an awm ngei a rin thu a sawi a. Thalai vengva tur deuh chin - College zirlaite hnenah te Stock Market leh a kaihhnawih thil te FLW chhung hian zirtir ve ni se tha a tih thu a sawi bawk.

Bank Official te report pek dan chuan FLW hi February 13 atanga 17 thleng neih a ni leh dawn a. He hunah hian Bank kaihnawih thil leh sum enkawlna chungchangah zirtirna ngawrh taka inpek tum a ni a. Kumin-a FLW neih turah hian Zirlaite, loneitute, Self Help Groups leh sumdawng te nau te zirtirna uluk zawka pek tum a ni. Financial Inclusiveness leh Education tih thupui hnuaiah kawng hrang hrangah sum vawm dan, Bank Services chungchang leh a dang te zirtirna pek tum a ni a. FLW chhung hian Bank Official te chuan sum peipun dan leh sum khawl dan awmze nei zawk customer te hriattir an tum dawn a ni. Heng bakah hian sum leh Bank Account kaihhnawiha bumna chi hrang hrang laka customer leh mipui nawlpui an lo him zawk dan tur chungchang pawh a zau thei ang bera inzirtir tum a ni bawk.

Comments

Popular posts from this blog