Mizoram Khawpui Fai inelna endik tan a ni

Kumin atana Mizoram Khawpui Fai thlanna neih tur atana endik hna chu thawh tan a ni dawn ta a, nimin zing khan endiktu tura ruat ‘Panel of Judges’ te chu Aizawl Vanapa Hall kawt atangin UD&PA Director H. Lianzela chuan a vailiam a ni.

Mizoram Khawpui Fai inelna atan hian kumin August ni 1, 2022 atanga November ni 30, 2022 chhung khan inpuahchahna kalpui a ni a, nimin Dec. 5, 2021 atanga Dec. 20, 2022 chhung hian endikna hi kalpui a ni dawn a, endik hna thawk tur Panel of Judges atan mi 6 ruat niin DIPR Officer, Mizoram Pollution Control Board Officer, MJA, STAM, HISS-LAM leh Central YMA atangin mi pakhat theuh ruat an ni a, Team 2-ah inthenin tehfung (parameters) hrang hrang hmangin endik hna hi tan nghal a ni.

Mizoram Khawpui Fai Inelna 2022-ah hian Mizoram khawpui 28 te chu Category 3-ah then an ni a, Category-I ah AMC Ward hrang hrang awmin December 19 leh 20-ah endik an ni anga, Category-II ah District Hqrs. 10 te an awm anga, tunkar chhungin Champhai, Khawzawl, Saitual, Mamit leh Kolasib endik a ni anga; karleh khian Siaha, Lawngtlai, Lunglei, Hnahthial leh Serchhip endik a ni ang. Category-III ah Town Area dang te awmin tunkar chhungin Thenzawl, Tlabung, North Vanlaiphai, Biate, Khawhai, Farkawn, Ngopa leh Phullen endik a ni ang a; karleh ah Sairang, Lengpui, West Phaileng, Kawrthah, Zawlnuam, Bairabi, Vairengte, North Kawnpui leh Darlawn endik a ni ang.

Nimin-a Panel of Judges vailiamna ah hian UD&PA Director chuan he inelna ah hian khawtinin theihtawp an chhuah nia a hriat thu a sawi a, felfai leh dik taka endik hna thawh a nih ngei a beisei thu a sawi bawk a ni.