FOCUS hmalakna a Hmarcha sawngbawlna tur enfiah

Champhai-a District Level Coordination Committee (DLCC) on FOCUS member-te chuan nimin chawhnu khan Champhai Zote-a FOCUS kaltlanga Hmarcha sawngbawlna kawnga hmalakna an enfiah.

Champhai District chhunga Fostering Climate Resilient Upland Farming System in the North-East (FOCUS) hmalakna hrang hrangte ngaihtuaha ruahmanna siamtu, District Level Coordination Committee (DLCC) on FOCUS Member te hi an Chairman leh Champhai DC James Lalrinchhana chuan hovin FOCUS, District Management Unit Champhai kaltlanga Mizo Hmarcha tharte hralhna leh sawngbawlna buaipui a ni chu remchang a tih thu sawiin, tharchhuah mai bakah a hralhna lam thlenga ngaihven tel chhunzawm zel a tul tih a sawi a. Thingtlangpa Foods Limited Liability Partnership (LLP) te hmalakna chu fakawm a tih thu pawh a sawi bawk.

Thingtlangpa Foods Limited Liability Partnership (LLP) te hian FOCUS kaltlang hian 'Processing & Branding of Mizo Chilli' tih Project chu an kalpui mek a, he Project atan hian Rs. 49,98,903/- ruahman niin Rs. 35,00,000/- pekchhuah tawh niin nimin-a hmalakna enfiah a nih atang hian sum hi pekchhuah leh tur a ni dawn a. LLP te hian Mizo Hmarcha tharte hi Khuangthing, Bungzung leh Tuipuiral khaw dangte atangin kg-ah Rs. 270/- in an lei khawm a, kum 2021 atanga bultanin hemi kum hian Ton khat (1) vel an lei a, kumin chhung hian Ton 9 vel leikhawm tawhin State pawn lamah an thawn tawh a, nakum January thla thleng hi chuan Ton 25 thleng leia thawnchhuah theih an beisei a ni. Heng bakah hian Hmarcha sawngbawlna hmunhma leh khawlte, Office thlengin an buaipui chho mek a ni.