Agriculture Product Marketing Committee Act Board kan din dawn - Agriculture Minister

Agriculture Minister C. Lalrinsanga chuan 'Agriculture Product Marketing Committee Act Board' an din dawn thu a sawi.

MNF Party in nimin-a Aizawl Mizo Hnam Run-a Chhung Inkhawm an neih ah MNF Adviser leh Agriculture Department changtu Minister C. Lalrinsanga chuan, “Agriculture-a rahbi thar kan rem zawng zawngte hi kum thum (3) kan kalpui leh anih chuan hmel fai takin hmasawnna kan nei ngei ang,” tiin 'Agriculture Product Marketing Committee Act Board' an din dawn thu hi a sawi a, “Kan Chief Minister hoin ruahmanna kan siam mek a, chu chuan kan thlai tharte tihral zung zung dan kan ngaihtuah dawn a, India ram mai nilo, Foreign Country thlengin hralh kan tum a, Hmarcha (Mizo Chilli) pawh Matric Ton 4 vel German leh USA-ah hralhchhuah tum mek a ni,” a ti a. Buh tih thatna turin OB-12 hman tan tum a nih thu pawh sawiin, “OB-12 a Bacteria hian buh leh thlai thatna tur tam tak a pui a, Pangang, Thlai eichhetu hrang hrangte hi Technology hmangin kan tihlum zel dawn a, Dragon Fruit-te pawh Drip-Technology hmangin enkawl mek a ni,” a ti bawk.

Irrigation and Water Resources Department changtu Minister ni bawk C. Lalrinsanga chuan Tuiverh chungchangah mahni compound chhunga duh duhna hmuna lo verh ve ngawtte hian kan tuihna tam tak a ti bo tih sawiin, “Kan ram humhim nan Dan siam thar thain kan hria a. ‘The Mizoram River Protection Bill’ hmang turin ruahmanna kan kalpui mek a ni,” a ti bawk.

C. Lalrinsanga chuan inthlan kan hmachhawn leh turah kawng hrang hrangin tan an lak a ngai tih pawh sawiin, “Kan hmabak ah kan opponent-te hi eng ang dinhmun nge an nih tih kan hriat a tha a, Mizoram-ah hian Political structure-ah chuan MNF hi a lian ber a ni a, Congress hian ruhrel lian tak an la nei ve bawk a, amaherawhchu, Central-a sawrkarna an neih loh chuan thuruk lakna tur an nei lo a, rintlak an ni chuang lo,” a ti a. ZPM chuan ruhrel nghet, rintlak an nei lo niin a sawi a. “Minister leh MLA-ah te hian eptu lam hian sawiselna tur min nei lemlo a, chutah tak chuan kan pu ber Chief Minister hi an bur bun ta ringawt a, Martar-te thisena lei hi kan Pathian hian kawng laklawhah min kalsan mai dawn lo tih hi achiang em em a ni,” a ti bawk.