Sawrkar aiawhte dinna ah JAC an lawm

JAC on Inner Line Reserve Forest Demand hruaitute chuan Assam leh Mizoram ramri chungchanga inbiakna November 17, 2022-a Guwahati-a neih ah Mizoram Sawrkar aiawh ten Mizoram mipuite duhdan, Bengal Eastern Frontier Regulation 1875 an dinpui chu lawmawm an tih thu leh beiseina sang tak an neih thu an sawi.

Nimin-a Aizawl Press Club-a thuthar thehdarhtute an kawmna ah JAC on Inner Line Reserve Demand Chairman Lallianzuala chuan tunhma a Mizoram ram luah chin ni thin kil hrang hrang a Assam lamin an luah sak nual nachhan chu khang hunlaia Political Party hrang hrangte leh sawrkar hnathawkte inthlahdah vangah an ngai tih a sawi a, tuna sawrkar hruaitute leh sawrkara mawhphurtute chu ram lakletna kawngah hma la zel turin an ngen takzet tih a sawi a ni. JAC hruaitute chuan State 2 ten inbiakna an kalpui mek lai leh Zoram mipuite BERF 1875 tanchhana an din ngheh lai meka Social Media hrang hranga Article ziaka thil dang sawi a awm thin chu pawi an tih thu leh tha lo an ti hle tih an sawi a, ramri chinfel tur chungchangah NGO leh party hrang hrangte chu hamthatna lak tum lo turin an chah tih an sawi bawk.