Serchhip-ah RTI Week hawnna neih a ni
Serchhip DC Conference Hall-a RTI Week hawnna puala inkhawm neih ah hian Addl. DC Lalmuansanga Ralte chuan RTI hmangin khua leh tui ten sawrkar hmalakna tinreng va hriatpui, va enpui theihna thiltihtheihna kan nei hi ram rorelna tha kan neih zia lantirtu a ni, tiin mipuite intluktlanna leh zalenna a awm theih nan a tangkai em em tih a sawi a. Tunhnaiah RTI zawhnate chu Mobile Phone Application hmanga awlsam taka hman theihin kan neih tak zel thu sawiin, thil tha leh tangkai tak tak tih nan mipuiten kan hman uar zel a pawimawh thu a sawi a, RTI hmangin ram hmangaihtu khua leh tui ten ram rawngbawl hna thawk zel rawh u, a ti bawk.
Bawrhsap mawhphurhna la mektu Addl. DC chuan RTI zawhna chhangtu Official te pawhin RTI zawhna a hun taka chhan chu an hna peng tesep a ni lo tih sawiin, kan hna pawi-mawh a ni tih hriaa, a hun taka zawhnate chhang thei tura inbuatsaih a tul thu a sawi a, “Mitin mai hi vena vil ngai kan nihna chen a awm a, ka hnathawhna kawng tinrenga min venga min vawngtu RTI a awm reng a ni tih hi i hrereng ang u,” tiin kalkhawmte a chah a ni.
Serchhip-a RTI Week 2022 hawnna inkhawm hi RTI District Resource Person R. Lalmuankimi chuan kaihruaiin Serchhip-a SAPIO, SPIO, DAA leh tlawmngai pawl aiawhte, khawtlang hruaitute, chanchinbumite, RTI Activists sawm bikte leh zirlai naupang sawm bikte an tel a, RTI District Resource Person Stephen Laltlansanga Auhmun chuan kalkhawmte hi RTI chungchang tlangpui zirtirin K. Saitluanga MIS, District Resource Person in lawmthu sawina hun a hmang bawk a ni.
Comments
Post a Comment