RD Minister Lalruatkima’n East Lungdar-ah Rurban Training Centre-cum-BDO's Office a hawng

Rural Development (RD) Minister Lalruatkima chuan nimin khan East Lungdar-a Rurban Training Centre cum BDO's Office sak thar leh MzSRLM hnuaia Buhzem Cluster Level Federation Office sak thar te chu a hawng a, “Kan phak chin chinah rualpawl turin theihtawp kan chhuah zel a ni,” a ti.

Heng building thar hawnna hunah hian RD Minister Lalruatkima chuan thingtlang khua in hma an sawnna turin Scheme hrang hrang kaltlangin Rural Development Department in hna a thawk tih sawiin, a hlawhtlinna kan hmu chho zel chu lawmawm aa tih thu a sawi a. Mizoram-ah SPMRM chu kum 2016-ah Aibawk Cluster-ah tan a nih thu sawiin, kan thawh that vangin Cluster dang min pek belh hial a, Cluster 4 kan nei tawh a, tunah hian thingtlang khua ten khawpui anga hmasawnna ruhrel (infrastructute) an neih ve theihnan kan theih chinah tluang takin kan thawk mek zel a ni, a ti a. State Performance Indicator-ah India ram pumah pathumna kan nih hial thu sawiin, Cluster Based Performance Indicator-ah Aibawk Cluster chu India ram pumah pakhatna a ni bawk tih a sawi a, “Hei hi kan Officer te leh Staff te bakah Village Council leh mipuite thawhhona a that vang a ni a. Kan hlawhtlinna hi mipuite vang a ni,” a ti bawk.

Rural Development Minister in a hawn tak Rurban Training Centre cum BDO Office hi SPMRM (Rurban) hnuaia cheng nuai 120 hmanga sak niin Mizopa chhiara chhawng hnih a ni a, a building hnuai zawk hi BDO Office tura ruahman niin a chung zawng hi MZSRLM Office leh Training Hall tur a ni a, Training Hall-ah hian mi 50 vel lengin Training pekna tur hmanraw pawimawh Projector leh Sound System dah nghal a ni. Hei bakah hian Online hmanga Training theihna tur Video Conference Centre cum Meeting Room siam a ni bawk a, Conference Table bakah Video Conference System changtlung tak dah nghal a ni a, hetiang Video Conference Centre hi Mizoram chhunga RD Block Office-ah chuan a nei hmasa ber an ni bawk. He building hi kumin July thla khan sak zawh niin thla 12 chhunga zawh tura ruahman ni mah se thla 11 chhunga sak zawh a ni a, Mizoram Technocrats Company Private Limited ten a sak hna an thawk a ni.

Hemi ruala hawn Buhzem Cluster Level Federation Office hi SPMRM (Rurban) Scheme hnuaia Mizoram-a Cluster Level Federation Office hmasa ber a ni a, cheng nuai 20 senga sak niin a dung ft. 40 leh a vang ft. 32-a zau niin kumin September 27 sak zawh a ni. MzSRLM Scheme-ah hian chhungkua leh khawtlang tana Hmeichhia ten tangkai zawk leh ei leh bar zawnna kawngah pawh rintlak taka hna an thawh theihna turin Self-Help Groups (SHG) te din thin a ni a, heng SHG te hi khaw tinah Village Organization (VO)-ah an inthlung-khawm leh a. VO engemaw zat te chu Cluster Level Federation-ah an inchhungkhawm leh a, he building hawn tak hi tih changtlun chhoh zel tur niin SHG te tihchakna atan leh mumal taka an inhlawm-khawm theihna tura ruahman a ni.

Nimin-a he hun hmanna ah hian RD Minister Lalruatkima hian 'Aizawl Thlai Rate Android App' chu a khuhhawng nghal a, he Application hi Play Store atanga download mai theih niin hemi hmang hian Aizawl khawpui chhunga Bazar pathum (3)-a thlai man te awlsam takin hriat zung zung theih a ni tawh dawn bawk a ni.

East Lungdar BDO H. Lalhruaitluanga tarlan danin East Lungdar RD Block-ah hian khua 12 awmin BDO hnuaiah hian thawktu mi 35 an awm a, heng te hi BDO Office-ah 9, MGNREGA hnuaiah 17 leh MzSRLM hnuaiah mi 9 te an ni a. He hunah hian East Lungdar RD Block hnuaia hmalakna hrang hrang leh hmasawnna hnathawh te a tarlang nghal bawk a ni.