Electric Pre-Paid Smart Meter hlawkpui beisei a ni

Mizoram sawrkarin December, 2022 atanga consumer-te hnena Pre-Paid Smart Meter vuah a tum chu sawrkar leh mipuiten an hlawkpui dawn niin Power & Electricity department thawktu ten an sawi.

Power & Electricity Department thawktute chuan, “Pre-Paid Smart Meter hi mipuite hnena vuah a nih hun chuan mipuiten an hman man chiah chiah an chawi dawn avangin an inrenchem ang a, êng chhit man hi pek lawk ngai a nih dawn avangin bill pek loh leh bo thlau a tlem ang a. Department pawhin phai atanga sum tam tak senga power lei nana sum a hman thin a hum thei ang a. Mipui leh sawrkarin an hlawkpui dawn,” an ti.

Power & Electricity Department thawktute chuan Mizoram-ah êng chhitu chhungkua (consumer) 29,000 atanga 30,000 inkar vel an awm tih sawiin, heng mite hi meter thar vuah sak vek an ni dawn tih an sawi a. “Meter thar vuahna man hi consumer pakhat zelah Rs. 6,000 vel ni tura ngaih a ni a, meter man 22.5% (Rs. 1350) hi central-in a tum dawn a. A bak zawng hi kum 10 chhung zawi zawia rulh tur a ni,” an ti.

Pre-Paid Smart Meter hman a nih hun chuan mipuiten sum an seng tlem dawn tih leh top up thun chu a har lo tih sawi bawkin P&E thawkte chuan, “Consumer-ten an mamawh leh hman tawk tete-in êng chhit man tur kha thla khatah vawi hnih emaw, vawi thum emaw an top up thei tawh dawn a, thla tawpa a hlawma bill pek tur awm thin kha a awm tawh dawn lo a. Hei mai bakah top up thun hi a har lo a, Smart Phone nei lo tan pawh tuna Airtel, Vodafone, Jio-ah te top up kan thun ang hian mi dang pawhin an thunsak thei dawn a ni,” an ti bawk. 

Pre-Paid Smart Meter thatna sawiin, Meter Reader-ten kal chilha bill an buaipui ang kha a bo tawh dawn a, mipuiten an hman zat chiah chiah an chawi dawn bawk a, Reading a tihsual palh awm thei te, computer-a bill buaipuitu in tihsual palh a neih theihte a bo tawh dawn niin an sawi bawk.

Thulakna in a tarlan danin India ram hmun thenkhatah Pre-Paid Meter hi hman ni tawh mah se Pre-Paid Smart Meter hi hmang an la awm lo a, Pre-Paid Smart Meter hi India ram State pariat - J&K, Himachal Pradesh, Maharastra, Uttar Pradesh, Madhya Pradesh, Gujarat, Puducherry leh Mizoram-ah te a bultanna atan hman tum a ni a. Eng chhituten an êng chhit man tur an top up-na tur Mobile app chu sawrkar laipuiin a siam tawh a, he app atang hian bill pek dan leh balance-te mahni awm hmun atangin a en theih dawn a ni. Eng chhit man thar buaipui tur hian Service Provider rawih an ni ang a, anni hian kum 10 chhung an enkawl anga. Service provider tur hi sawrkar laipui chuan thlan bik a nei tawh a ni.