Lunglei-ah No Vehicle Day hman a ni dawn

“Sawrkar in nasa takin a hma a la” - Dr. Vanlaltanpuia MLA

Lunglei Sub-Hqrs. YMA chuan Aizawl-Thenzawl-Lunglei kawng chhe chhe lutuk siamthat thuai tura nawr nan tukin dar 6:00 atanga tlai dar 5:00 inkar chhungin Lunglei District-ah ‘No Vehicle Day’ hman an tum a, Lunglei North bialtu MLA Dr. Vanlaltanpuia chuan Lunglei kawng chhe chungchangah sawrkarin nasa takin hma a lak thu a sawi.

Lunglei Sub-Hqrs. YMA hruaitute chuan Lunglei kawng, Aizawl-Thenzawl-Lunglei (ATL) Road a chhiat vangin chhim lam mipuite nasa takin an buai tawh tih sawiin, he kawng hi chhim lam mipui te nunna hnar, engkim chawkluhna a ni tih an sawi a, Kawng chhia chungchang hi Chief Minister leh sawrkar mi pawimawhte pawh an lo sawipui tawh tih sawiin, an ngenna in awmzia a neih loh avangin hreh tak chungin tukin atanga No Vehicle Day an kalpui tur thu hi an sawi a, No Vehicle Day hian Magistrate Duty, Bawnghnute sem, PHE Tui sem, P&E Line Duty leh leh Medical Emergency Duty bakah Force leh Army te huam lovin a pawimawh zual chauh lirthei-a che turin an ngen bawk a ni.

Hetihlai hian Mizoram Youth Commission Chairman leh Lunglei North bialtu MLA Dr. Vanlaltanpuia chuan Lunglei kawng chhe chungchang ah MNF sawrkarin nasa takin hma a la tih nimin-a MNF Sub-Hqrs. Lunglei in Chhung Inkhawm an neih ah a sawi a, kum 2019 kumtir lam khan ATL Road siam that hna an zawh vek thu leh cheng vbc. 21 vel an sen thu sawiin, Pukpui leh Kikawn inkar kawng pawh an siam nawn hman vek niin a sawi a. Kumin April thlaah Sekhum leh Haulawng inkar an siam thu te, thla 4 hnu vela a chhiat leh vek thu pawh sawiin, Sawrkarin kawng siamna tur Pawisa pawh a neiin a dah thin tih a sawi a, a tlo loh chhanah kawng siamtu Engineer chu an in enfiah a ngai niin a sawi a ni.

Lunglei khawpui chhung, Kikawn leh AOC inkar kawng chhia siamna tur chungchang pawh sawiin Lunglei North Bialtu MLA chuan, kumin June thla khan contractor hnenah Work Order pekchhuah a ni tawh tih a sawi a, khaw awmdan in a zir loh avangin Contractor tan hmalak a harsat thu a sawi a, mipuite nawr vang pawh ni lovin siam that thuai a ni dawn tih sawiin, a siamtu te chu rei tak daih tura siam turin a chah bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar